Nga Saimir Sulaj, Washington
Kryeqyteti amerikan Washington, D. C. po përjeton mbase ditët më të veçanta politike të këtyre 20 viteve të fundit. Shumëkush këtu në kryeqendrën e politikave botërore hamendëson për një shkarkim të mundshëm të Presidentit Trump, i cili u zgjodh në detyrë vjeshtën e kaluar. Jo pak debate pati dhe vijon të ketë për mënyrën se si u zgjodh dhe duket se tanimë Presidenti i SHBA-së është në telashe. Për muaj me radhë, që prej fitores në zgjedhje, ai ngulmonte se gjithë sa thuhej për ndërhyrjen e Rusisë në favor të tij, ishte trillim i mediave, apo “fake news” siç thuhet në anglisht. Por tashmë gjërat po shihen në një tjetër këndvështrim.
Prokurori i posaçëm Robert Mueller po heton Presidentin Trump për pengim të mundshëm të drejtësisë, raportojnë mediat amerikane. Zyrtarët e lartë të agjencive amerikane të inteligjencës do të intervistohen nga grupi hetimor i drejtuar nga Mueller, nëse zoti Trump u përpoq t’i japë fund një hetimi mbi këshilltarin e tij të dorëhequr të sigurisë kombëtare, Michael Flynn dhe në lidhje me shkarkimin e shefit të FBI-së James Comey. Zoti Trump postoi në “Twitter” se kjo lëvizje ishte veprimi më i fundit i një “historie të rremë”.
“Ata shpikën një marrëveshje të fshehtë, totalisht e rremë. Nuk gjetën asnjë provë, dhe tani ata tentojnë të bllokojnë vënien e drejtësisë. Bukur!”, – shkruan zoti Trump në profilin e tij zyrtar në median sociale.
Prokurori i posaçëm Mueller po udhëheq një hetim të FBI-së mbi ndërhyrjen ruse në zgjedhje. (http://localhost/tesheshi/po-shkon-shba-drejt-watergate-2/)
Presidenti Trump ka mohuar në mënyrë të përsëritur çdo bashkëpunim me Rusinë. Të enjten, ai e përshkroi hetimin e vazhdueshëm si një “gjueti shtrigash”, që u “udhëhoq nga disa njerëz shumë të këqinj dhe që nxisin konfliktin”.
Përse po hetohet Presidenti?
Raportet e fundit nga mediat thonë se pengimi i hetimit filloi vetëm disa ditë pasi Presidenti Trump shkarkoi drejtorin e FBI-së Comey më 9 maj. Comey, i cili kishte udhëhequr një nga disa hetime, për çështjen e ndërhyrjes së mundshme të Rusisë, dëshmoi para Kongresit javën e kaluar se Trump kishte bërë presion që t’i jepte fund hetimit mbi ish-këshilltarin e Sigurisë Kombëtare, Michael Flynn.
Flynn dha dorëheqjen në shkurt sepse nuk zbuloi dot shtrirjen e kontakteve të tij me Sergei Kislyak, ambasadorin rus në Washington. Ish-drejtori i FBI-së Comey dëshmoi nën betim që zoti Trump i kishte thënë gjatë një takimi privat: “Shpresoj se mund ta shihni rrugën tuaj të qartë për të lënë këtë, për të lënë Flynn të shkojë, ai është një djalë i mirë.”
Shtëpia e Bardhë ka thënë se presidenti nuk i ka kërkuar kurrë Comey-t apo ndonjë tjetri të përfundojë ndonjë hetim, duke përfshirë çdo hetim që përfshin gjeneralin Flynn.
Ndërkohë që Comey gjithashtu tha në dëshminë e tij se ishte “i sigurt që Mueller po shqyrtonte nëse Trump kishte penguar drejtësinë”.
Çfarë pritet të ndodhë
Raportet e fundit gjithashtu flasin për një hetim për pastrim të mundshëm parash ndërmjet bashkëpunëtorëve të Trump. Një ish-zyrtar i lartë amerikan tha për “New York Times” se çdo bashkëpunim midis ekipit Trump dhe zyrtarëve rusë do të ndiqej me një shpërblim dhe se mund të ketë pasur përpjekje për të fshehur rrugën e pagesave duke përdorur bankat në det të hapur.
Presidenti Trump ka kërcënuar vazhdimisht ndaj nxjerrjes në shesh të informacioneve nga FBI, duke thënë se ky është një rrëfim i rëndësishëm, jo konflikti i supozuar me Rusinë, të cilën ai e ka hedhur poshtë duke e konsideruar si “lajm i rremë”. Ndërkohë që “New York Times” raporton se zoti Trump ka menduar ditët e fundit që të shkarkojë prokurorin Mueller, por është zmbrapsur nga ndihmësit e tij. Nëse nga raporti përfundimtar i prokurorit Mueller del që Trump ka penguar hetimet, vetëm një mrekulli do ta shpëtonte Presidentin amerikan nga procesi që njihet me emrin “impeachmet” këtu në SHBA, ose nisje e procedurave për shkarkimin e tij nga Kongresi. /tesheshi.com/
