Nga Blendi Gashi
Vendimi i institucioneve të Kosovës për ndalimin e trenit serb me mbishkrime nacionaliste që të hyjë në Mitrovicë, është mirëpritur nga qytetarë, opozitarë e analistë, duke e vlerësuar si një veprim që mbron sovranitetin e shtetit, ku meritat më të mëdha shkuan në adresë të Njësisë Speciale të policisë ROSU.
Menjëherë pas këtij veprimi, ashtu edhe siç pritej në opinioin publik kosovar u shtrua pyetja: kush e ndali trenin?
Dhe meritat shkuan në drejtim të presidentit Hashim Thaçi i cili qe i pari nga krerët e vendit që deklaroi se ka urdhëruar që trenit serb të mos i lejohet hyrja në territorin e shtetit.
Edhe kryekuvendari Kadri Veseli, përmes një postimi në Facebook, ia atribuoi meritat Thaçit, duke thënë se institucionet, duke respektuar urdhrin e presidentit për ndalimin e hyrjes së trenit serb në Kosovë, treguan vendosmërinë për ruajtjen e sovranitetit shtetëror.
Njëjtë ka vepruar edhe deputeti i pavarur, Gëzim Kelmendi, i cili ka thënë se kthimi i “trenit rus”, ka tre meritor dhe një fitues.
Ai thotë se fitues është shteti, kurse meritor presidenti Thaçi, qytetarët dhe njësia special “ROSU”.
Edhe agjencitë prestigjioze të lajmeve, “Reuters”, “AP” dhe “AFP”, kanë raportuar për urdhrin e presidentin Thaçi që të dërgohen forcat speciale për të parandaluar hyrjen e trenit.
“Hashimi vrapon për të nxjerrë përfitime”
Por kreut të NISMA-s Fatmir Limaj, dikur shokë armësh dhe bashkëpartiakë, nuk i ka pëlqyer aspak që për ndaljen e trenit meritat t’i mveshëm presidentit.
“E tash filloj gara se kush e ndali trenin..!
Si gjithmonë e kemi Hashimin i cili vrapon për të nxjerrë përfitime për veten e tij, nga angazhimi dhe puna e të tjerëve.
Trenin nga Serbia e ndali presioni publik në Kosovë dhe poashtu angazhimi i ndërkombëtarëve të cilët e kuptuan se ky veprim i qeverisë së Serbisë po e cenon rendin dhe sigurinë në Kosovë”, ka shkruar Limaj, në Facebook.
“Thaçi ka shkelur Kushtetutën”
Por ka edhe deputet ëdhe njohës të rrethanave politike në vend, që kanë reaguar ndaj deklarimeve të presidentit Thaçi
Deputeti i pavarur Ilir Deda, thotë se policisë mund t’i jap urdhëra vetëm Ministria e Punëve të Brendshme me kërkesë të kryeministrit.
“Nëse është e vërtetë që Thaçi i ka dhënë “urdhër” ministrit të brendshëm dhe drejtorit të policisë, derisa Isa Musafa ligjëronte, atëherë kemi shkelje të Kushtetutës. Dhe tentim-rrënim të demokracisë”, ka shkruar Deda, derisa ka përshëndetur ndaljen e trenit serb.
“Trenin e ndali Vuçiqi”
Ndërsa Flaka Surroi, drejtuese e grupit media “Koha”, thotë se trenin e ka ndal Vuçiqi, ku sipas saj me siguri dikush ia ka ngreh veshin me i tregu se është më mirë me e ndalë atë në Rashkë se mos me e ndalë.
“Hashimi mundet me u fry sa të dojë se e ka urdhëru policinë, dhe në fund me dalë ose gënjeshtar ose shkelës i Kushtetutës”, ka shkruar në Facecbook Surroi.
Ndryshe, i revoltuar për moslejimin e hyrjes së trenit serb në Mitrovicë, kryeministri i Serbisë, Aleksandër Vuçiq, përmes një konference të jashtëzakonshme për media, ka thënë se “pasi ka parë që Kosova ka dërguar njësitë speciale në Jarinjë ka vendosur që të japë urdhër që treni të ndalet në Rashkë, siç ka thënë ai, për t’i ikur konfliktit të shkallës së gjerë”. /tesheshi.com/
