“Topçinjtë” e Londrës do të kenë një trajner të ri pas një periudhe thuajse 22-vjeçare. Arsene Wenger i përket tashmë së shkuarës, dhe do duhet fare pak kohë në muajt e ardhshëm për të kuptuar nëse tifozët kanë patur të drejtë kur kanë kërkuar me ngulm largimin e tij.
Unai Emery, ish-trajneri i PSG-së, e më herët, mes të tjerash, i Valencias dhe Seviljes, është konfirmuar si zëvendësuesi i Wenger-it, me një kontratë trevjeçare të ofruar për të.
Ai u parapëlqye kundrejt Mikel Arteta-s dhe Patrick Vieira-s, dy ish-lojtarë të Arsenalit pretendentë po ashtu për postin.
Emery fitoi shtatë trofe përgjatë dy sezoneve me ekipin e kryeqytetit francez, pa ia dalë gjithsesi të ketë sukses në Champions League, si objektivi kryesor i PSG-së.
Spanjolli do të ketë përpara detyrën e vështirë të rikthimit të shkëlqimit të Arsenalit, humbur në vitet e fundit.
“Jam i kënaqur t’i bashkohem një prej klubeve më të mira në botë. Jam i entuziazmuar nga përgjegjësia e nisjes së këtij kapitulli të ri dhe të rëndësishëm në historinë e Arsenalit,” deklaroi Emery për faqen zyrtare elektronike të klubit anglez. /tesheshi.com/
