Duke prezantuar ngritjen e një Task Force për ujin, pagesën dhe disiplinimin e këtij sektori në kuadër të një reforme të thellë, ngjashëm si me energjinë, kryeministri Edi Rama e përshkoi këts sektor si tërësisht të degraduar dhe me tregues katastrofikë.
“Po bëhen 30 vjet që uji konsiderohet si një mall pa zot. Një mall pa zot sepse në të gjithë territorin mbi ujin nuk ka pasur shtet dhe duhet të jemi të gjithë të turpëruar që ndërmarrjet e ujësjellësave janë kthyer nga kompani në ndërmarrje punësimi për njerëz që nuk kanë lidhje me sektorin, por janë pjesë e një procesi gërryes për vetë kompanitë dhe burimet ujore.
Në Shqipëri ne përdorim 10 herë më shumë energji elektrike sesa në Gjermani për të sjellë ujë. Në koston e ujit që kosnumojmë 40% e zë vlera e energjisë elektrike për pompat e vendosura në çdo pallat apo ujësjellës. 12% e energjisë së faturuar shkon për të nxjerrë ujë të pijshëm, afro 30 mln euro në vit. Gjatë 4 viteve të fundit është shpenzuar 400 mln euro për të ndërtuar ujësjellës së rinj.”
Sipas Ramës, ka ardhur dita që të ndërhyet fort dhe në këtë sektor.
“Vetëm një rreformë rrënjësore me një vendosmëri të hekurt e ngjashme me reformën dhe vendomërinë që patëm në sistemin energjisë elektrike, mund të na japë zgjidhjen të dalim nga ky sistem i falimentar që mbahet në agoni dhe duke shpenzuar para pa fund dhe pa marrë mbrapsht përmirësime në jetën e përditshme të qytetarëve”, deklaroi shefi i qeverisë. /tesheshi.com/
