Kryeministri irakian, Hajdar el-Abadi, ka lajmëruar në orët e para të së hënës për nisjen e ofensivës së shumëpritur e të shumëdiskutuar për rimarrjen e Mosulit prej ISIS-it.
Ndërsa ka bërë të ditur se operacionit do t’i bashkohen vetëm forcat ushtarake dhe policore irakiane, el-Abadi ka deklaruar në një transmetim televiziv se, “Koha e fitores ka ardhur, dhe operacioni për ta çliruar Mosulin ka nisur. Sot deklaroj nisjen e këtyre operacioneve fitimtare për t’ju çliruar ju nga dhuna dhe terrorizmi i ISIS-it.”
Në kryeqytetin de facto të ISIS-it në Irak jetojnë rreth 1.5 milionë civilë, dhe sipas OKB-së, shumë prej tyre pritet të zhvendosen gjatë operacionit.
Mosuli është qyteti i dytë më i madh i Irakut, si dhe qendra e fundit urbane në vend nën kontrollin e ISIS-it. Operacioni për çlirimin e tij vjen pas rimarrjes së një pjese të mirë të territorit gjatë dy viteve të shkuara.
Turqia është treguar shumë e ndjeshme ndaj operacionit, duke kërkuar shmangien e përplasjeve sektare.
Ministri i Jashtëm turk, Mevlyt Çavushogllu, ka deklaruar të dielën se milicitë shiite duhet të përjashtohen nga mësymja për marrjen e Mosulit, “që vendasit të mos shtrëngohen të bëjnë një zgjedhje midis terroristëve të ISIS-it dhe grupeve shiite, që po i sulmojnë muslimanët sunnitë në rajon”.
Ai ka kërkuar që operacionin ta udhëheqë ushtria irakiane, me mbështetjen e forcave të koalicionit dhe peshmergave.
Sekretari amerikan i Mbrojtjes, Ash Carter, e quajti operacionin një moment vendimtar për mposhtjen e ISIS-it.
“Shtetet e Bashkuara dhe pjesa tjetër e koalicionit ndërkombëtar janë gati t’i mbështesin forcat irakiane të sigurisë, luftëtarët peshmerga, dhe popullin e Irakut në betejën e vështirë përpara,” tha ai në një deklaratë nga Uashingtoni.
Beteja për Mosulin parashikohet të jetë e vështirë dhe e gjatë. /tesheshi.com/
