Deti duhet të jetë i qetë sot, por pak metra larg tij, në ambientet e Hotel Adriatikut, do të ketë dallgë të forta në orët në vazhdim.
Një garë e fortë njëmujore, si asnjëherë tjetër në thuajse dy dhjetëvjeçarë, mbyllet sot me verdiktin që do të japë votimi në Asamblenë e Përgjithshme të FSHF-së.
A do të vijojë të udhëhiqet nga Armando Duka organizmi drejtues i futbollit shqiptar, apo në vend të vend të tij do të vijë Bashkim Fino?
Një kandidat i tretë është po ashtu në garë, por i lënë në hije gjatë këtyre javëve, mundësitë që ai të marrë mbështetjen e votuesve duken fare të pakta.
Armando Duka, një Blatter apo Platini shqiptar sa i takon jetëgjatësisë në postin e presidentit të FSHF-së, kërkon një mandat të pestë pasi ka drejtuar pothuajse gjatë gjithë shekullit të ri. Ai del para Asamblesë me suksesin më të madh deri më sot të futbollit shqiptar: pjesëmarrjen në Europian!
Me kostum politikani, Bashkim Fino, sfiduesi i ashpër i Dukës, premton duar të pastra në administrimin e lojës me top dhe pa top të FSHF-së! Ai ka me vete të pakënaqurit me Dukën, si dhe mbështetjen e paperceptueshme, por të pranishme, të partisë në pushtet, së cilës i përket.
Do hapet me të një faqe e re në drejtimin e FSHF-së? Vështirë ta thuash, ndonëse shumë e duan këtë gjë.
Ngjashëm me një fushatë elektorale, debati mes dy kampeve ka qenë i zjarrtë gjatë janarit, shpesh dhe me përplasje verbale. Nëse politika është një sport tërheqës në Shqipëri, futbolli është një politikë më vete, prandaj ngjajnë aq shumë dhe fushatat për zgjedhjet.
Me Dukën apo pa Dukën? Në dorë sot e ka Asambleja e Përgjithshme e FSHF-së! /tesheshi.com/
