Jemenasit mund të marrin frymë paksa të lehtësuar për një numër të kufizuar ditësh, ndërsa nis sonte në mbrëmje armëpushimi shtatëditor mes forcave qeveritare dhe rebelëve husinj.
Armëpushimin do ta pohonte ministri i Jashtëm jemenas, Abdulmelik el-Mehlafi, i cili deklaroi se luftimet do të ndalojnë në mbrëmjen e 14 dhjetorit.
Të njëjtën gjë ka thënë dhe një zëdhënës i rebelëve husinj, Muhammed Abduselam, në një konferencë shtypi në kryeqytetin e vendit, “Mbështetur në atë për çka është rënë dakort, do të ketë një ndalim të agresionit në 14 të këtij muaji.”
Ndërkohë, nesër do të nisë në Zvicër një raund i ri negociatash mes palëve në luftim, me shpresën se rezultati i tyre do të jetë ndryshe nga ai i bisedimeve të qershorit, që dështuan të ofrojnë paqe.
Prej nëntë muajsh ka një betejë të ashpër mes forcave të presidentit Abdurabbi Mansur Hadi, të mbështetura nga sulmet ajrore e forcat tokësore të një koalicioni të udhëhequr nga Arabia Saudite, dhe rebelëve husinj, të cilët mbështeten nga Irani e kontrollojnë një pjesë të mirë të veriut të vendit.
6.000 është numri i të vrarëve në këtë konflikt, dhe, sipas UNICEF-it, gati gjysma e tyre janë civilë, nga të cilët 637 janë fëmijë. /tesheshi.com/
