I trumbetuar me të madhe, armëpushimi në Siri ka nisur në të ngrysur të së hënës, duke përkuar me Kurban Bajramin. Megjithatë, ka një optimizëm të rezervuar mbi rezultatet në terren të marrëveshjes mes SHBA-ve dhe Rusisë.
Vëzhgues nga afër i zhvillimeve në Siri, Observatori Sirian për të Drejtat e Njeriut e ka përshkruar si të qetë situatën në zonat e konfliktit anekënd Sirisë.
Drejtuesi i këtij organizmi, Rami Abdulrahman, deklaroi se po mbizotëronte qetësia, duke mo harruar të thotë se në jugperëndim të Sirisë ka patur bombardime të lehta nga forcat qeveritare dhe nga kryengritësit.
Ushtria e Lirë Siriane dhe disa grupe të tjera kryengritëse e kanë quajtur të padrejtë marrëveshjen diçka pas nisjes së armëpushimit, por nuk e kanë hedhur poshtë tërësisht atë.
Sfidues në një shfaqje të rrallë publike, kreu i regjimit sirian, Beshar Esadi, është zotuar se do t’ua rimarrë të gjithë Sirinë terroristëve.
Duke folur në Darejja, një fortesë e kryengritësve, por që ditët e fundit ra në dorë të qeverisë pas një rrethimi të gjatë dhe pas shpërnguljes masive të banorëve, Esadi ka theksuar se është i vendosur të rimarrë çdo pjesë territori.
“Forcat e armatosura po vazhdojnë punën e tyre pa hezitim dhe pa ndërprerje, pavarësisht nga rrethanat e brendshme dhe të jashtme,” ka vënë në pah Beshar Esadi pak më herët se të niste armëpushimi.
John Kerry, në anën tjetër, ka kërkuar nga të gjitha palët që ta respektojnë armëpushimin. Në një konferencë shtypi në Departamentin e Shtetit, sekretari i Jashtëm amerikan do ta quante armëpushimin e tanishëm si mbase mundësinë e fundit për të arritur paqen në një Siri të bashkuar. /tesheshi.com/
