Shkalla e dëmit të kryer nga militantët e ISIS në qytetin antik të Nimrudit po nis të përvijohet pak e nga pak, dy ditë pasi ai u rimorr në kontroll nga ana e forcave irakeve të sigurisë. Pjesa më e madhe e qytetit është e rrënuar, me statujat e thyera dhe me monumente të reduktuara vetëm në një fraksion të madhësisë që kanë pasur. Duket se fotografitë dhe videot e postuara nga militantët duke hedhur në erë monumentet janë verifikuar më se të vërteta.
Forcat qeveritare e rimorrën Nimrudin si pjesë e një ofensive të gjerë mbi Mosulin, që mbetet bastioni i fundit i madh i militantëve në Irak.
Qyteti i Nimrudit, rreth 32 kilometra në jug të Mosulit, është themeluar më shumë se 3300 vjet më parë. Avionët bombarduan pozicionet e militantëve në aeroportin e Mosulin, në periferitë jugore, ndërsa njësitë të divizioneve elitë rrethuan fshatin e afërt Albu Saif.
I njohur si Kalhu, qyteti ishte kryeqytet i perandorisë Asiriane.
Vendndodhja mbulon rreth 3.5 kilometra katrorë dhe përfshin një citate dominante të ngritur mbi fushë, pallate dhe varre të mbretërve asirianë, tempuj të zotave të tyre, statuja kolosale që përfytyrojnë luanë dhe buaj me krahë dhe afreske që janë vlerësuar shumë nga ekspertët.
Krahasimet me atë që qyteti antik ishte dikur janë të dhimbshme, siç duket dhe në një fotografi të një gazetari të AFP që tregon atë që duket se është mbetja e një zigurati që dikur ishte struktura më e lartë e mbijetuar nga bota antike.
Në mars 2015, ministria irakiane e Turizmit, raportoi se militantët kishin përdorur bulldozerë dhe mjete të tjera të rënda për të shkatërruar qytetin. Një muaj më pas, ISIS publikoi video ku tregoheshin militantët duke shkatërruar statujat dhe afresket me çekanë të rëndë përpara se t’i hidhnin në erë pjesët e mbetura.
Videoja tregonte gjithashtu militantët që shkatërronin artefaktet. Të martën, një komandant i milicive tribale duke vizituar vendin për herë të parë në dy vjet tha për agjencinë e lajmeve AFP: “Kur keni ardhur këtu më parë, mund ta imagjinonit jetën që bëhej dikur në këtë vend. Tani nuk ka asgjë”.
“100 për qind shkatërrim”, shtoi Ali al-Bayati. “Humbja e Nimrudit është më e dhimbshme për mua sesa humbja e vetë shtëpisë sime”.
UNESCO e denoncoi shkatërrimin e vendit pjesë e trashëgimisë botërore në Irak si “krim lufte”. Organizata e përshkroi shkatërrimin e Nimrudit, vitin e kaluar, si një përpjekje e qartë për të fshirë nga faqja e dheut të gjitha gjurmët e historisë së popullit të Irakut.
Militantët i kanë shpallur artin para-Islam dhe arkitekturën si idhujtare dhe kanë shkatërruar edhe vendndodhje të tjera në Irak e në Sirinë fqinje.
Përgatiti: Juli Prifti – /tesheshi.com/
