Mathew Nimic, ndërmjetësi i OKB-së për emrin e ri të Maqedonisë ka mbërritur në Shkup me propozimin gati final për “Republikën e Maqedonisë së Epërme”.
Siç bën të ditur agjencia e lajmeve MIA, Nimiç deklaroi përpara takimeve në Shkup se “Kishim takime të mira në Athinë. Shpresoj se do të kemi takime të mira edhe këtu. I gëzohem takimeve me qeverinë dhe liderët tjerë”.
Deklaratë zyrtare për vizitën dhe efektet e bisedimeve në Shkup, ndërmjetësi Nimiç, sipas paralajmërimeve të MPJ-së, do të japë nesër pas takimit me ministrin e Punëve të Jashtme, Nikolla Dimitrov.
Nimiç, siç është paralajmëruar, gjatë qëndrimit dyditor do të pritet nga presidenti Gjorge Ivanov dhe kryeministri Zoran Zaev.
Nimiç do të takohet edhe me kryetarin BDI-së, Ali Ahmeti dhe me kryetarin e VMRO-DPMNE-së, Hristian Mickovski.
Pas pranimit në parim për emrin, siç bëjnë të ditur mediat greke, Athina do t’i dorëzojë qeverisë së Shkupit një plan me 4 pika i cili do të përfshijë zgjidhjet e problemeve që kanë pasur dy vendet me njëri-tjetrin.
Plani nëse pranohet nga Zaev do të shkojë një herë për miratim në Parlamentin grek dhe më pas do të votohet nga Kuvendi i Maqedonisë. /tesheshi.com/
