Kryeinspektori i Përgjithshëm në Kryeministri, Shkëlqim Hajdari, që ndryshe, për nga vetë posti që mban mund të quhet jo politikisht por zyrtarisht dhe si “njeriu i Ramës”, kjo pasi emërohet me firmën e këtij të fundit, ka postuar “shkujdesshëm” në FB një foto me zërin mediatik të LSI-së për momentin, Nikollë Lesin e Koha Jonë, pjesë e “artilerisë së rëndë” kundër Ramës, duke e quajtur deri dhe “Mourihno-n e gazetarisë shqiptare”
“Nje bisede e kafe, ne kohe turbullirash me Nikoll Lesin, ‘Murinjon’ e gazetarise shqiptare”, shkruan Hajdari.
Dhe ndër reagimet e shumta, më shumë profesional se sa politik, ka qenë ai i gazetarit Artan Hoxha.
“Po mbeti Nikolla te jete Murinjo i gazetarise shqiptare, me mire po nderroj sport e po merrem me ping-pong… ishallah se merr vesh kete krahasim Murinjo i vertete se do vras veten si Salvador Allende…”, shkruan Hoxha.
Ky i fundit nuk i përket shkollës Koha Jonë të viteve ’90, ku formësimin e plotë profesional do e merrte te Shekulli i Kokëdhimës në fund të ’90 dhe fillimi i viteve ‘2000, duke qenë njëherësh dhe ndër penat e forta kundër aferave të qeverisë Nano.
Por a ka qenë vërtet Nikollë Lesi një “Mourinho” në gazetari. Fama e tij i përket më tepër kohës ku e pati se atij vetë si person.
Siç është parë këto vite, Koha Jonë e tij nuk ka mundur dot t’i rikthehet pozitës së dikurshme.
Dhe, nëse nuk do ishte Tema e Mero Bazes që ia publikon shkrimet e tij deri dhe me gjuhë rruge e militare, Lesi do vijonte të ishte periferik, siç që pas mesit të viteve 2000, kur përfundoi dhe një karrierë politike e nisur si deputet në Lezhë.
Në vitet ’90, vërtet Koha Jonë, gazetë ku shkruante dhe Rama, e që arrinte majat e shitjeve pikërisht ditën kur Rama kishte shkrim, ishte një produkt i kohës në famë, pasi në të u përfshinë disa emra të njohur, por më tepër se kaq, arriti të përthithë zemërimin popullor nga firmat piramidale, duke e produktuar më pas në sulme të ashpra ndaj qeverisë Berisha.
Paralel me të, ishte dhe Gazeta Shqiptare e drejtuar nga Fatos Baxhaku, shumë më profesionale se Koha Jonë, edhe nga vetëpërmbajtja etike në gjuhë. Por pjesa ekstreme e frymës anti-Berishë, e gjente veten te Koha Jonë, gjë e cila ia rriti famën brenda një konteksti politik.
Ndaj, sa ç’ka qenë i sukseshëm si Mourinho në një moment, po aq ka qenë dhe i dështuar, po siç trajneri portugez.
Aktualisht futet te dështimet, gjersa është me misionin e rikrijimit të një fryme ’97-te, kësaj here kundër Ramës, pa qenë aspak lider mediatik. /tesheshi.com/
