Pas pafajësisë së dhënë nga Gjykata e Hagës (pas vdekjes), numri dy i qeverisë serbe, Ivica Daçiq propozoi që për Sllobodan Milosheviqin të ngrihet një monument dhe t’i vihej emir një rruge në Serbi.
Pas këtij propozimi, presidenti serb, Tomislav Nikoliq, deklaroi në një intervistë në gazetën Kurir se nuk ishte kundër nëse këtë e vendosin “organet kompetente”.
“Nuk jam unë që mund ta marr një vendim të tillë. Ligji ua ka dhënë këtë të drejtë këshillave bashkiake dhe ministrit të Veteranëve, Aleksandër Vulin,” tha Nikoliq, i cili kërkoi që nëse ngrihet një monument për “kasapin e Ballkanit”, ai nuk duhet t’i ndajë serbët.
“Unë e kam mbështetur luftën e tij, dhe e kam kundërshtuar kur ka bërë hapa prapa. Por një momument kushtuar atij nuk duhet ta ndajë Serbinë, dhe unë e di që ka njerëz të cilët e kanë përdhosur Serbinë vazhdimisht dhe duan ta rrëzojnë një shtatore të tij,” i ka thënë Nikoliq gazetës Kurir.
Ndërkaq, gazeta tjetër serbe, Veçernje Novosti, bën të ditur se kryeministri Aleksandër Vuçiq ka replikuar ashpër me ministrin e tij të Jashtëm, Daçiq, në mbledhjen e parë të kabinetit qeveritar.
Sipas gazetës, e cila mban anën e mazhorancës, “Vuçiq i ka thënë Daçiqit se këto deklarata e dëmtojnë rëndë imazhin e Serbisë në arenën ndërkombëtare”.
Në fakt, si presidenti, Tomislav Nikoliq, si Daçiq, ashtu edhe Vuçiq, kanë qenë të gjithë bashkëpunëtorë të afërt të Sllobodan Milosheviqit kur ky i fundit kreu masakrat e tmerrshme në Kosovë.
Nikoliqi ka qenë kryetar i Parlamentit të Serbisë, Vuçiqi ka mbajtur postin e ministrit të Informacionit në qeverinë serbe, ndërsa Daçiqi ka qenë zëdhënës dhe “ylli në ngritje” i Partisë Socialiste Serbe, që u krijua dhe drejtua nga Sllobodan Milosheviqi. /tesheshi.com/
