Presidenti serb, Tomislav Nikoliç, do të marrë një çmim në Moskë, i cili quhet “Fondi Ndërkombëtar për Bashkimin e Ortodoksëve”.
Nikoliç do të nderohet në një ceremoni solemne që mbahet në Moskë, ku ai do të takohet edhe me presidentin rus, Vladimir Putin. Në fakt, kjo ceremoni do të mbahet më 9 mars, por mediat serbe, sidomos ato pranë krahut konservator, po i bëjnë jehonë të madhe.
Presidenti i Fondit Panortodoks, Valery Alekseyev, u tha reporterëve në Beograd se Nikoliç do të marrë ftesë zyrtare për samitin e Moskës. Përveç Nikoliçit, në ceremoninë vjetore do të jetë edhe patriarku i Kishës Ortodokse Bullgare, si dhe kreu i parlamentit rus, Sergei Naryshkin.
I gjithë ky sponsorizim i Nikoliçit nga ana e Moskës bëhet në prag të zgjedhjeve të parakohshme që pritet të shpallen nga ana e qeverisë së Aleksandër Vuçiçit.
Alekseyev tha se çmimet do të jepen “me bekimin e patriarkut të Rusisë, Kirili”, si dhe shtoi se takimi i Nikoliçit me Putinin tregon se vizita nuk është thjesht sociale, por edhe me rëndësi politike.
Alekseyev bëri të ditur se këtë çmim, përveç Putinit, e kanë marrë dhe presidenti i Bjellorusisë, Alexander Lukashenko, e po ashtu tenisti serb Novak Xhokoviç. /tesheshi.com/
