Presdenti serb, Tomas Nikoliç ka dhënë një intervistë, e cila nga disa media opozitare serbe po cilësohet si një shfajësim i të ashtuquajturit “Klani i Zemunit”, i është akuzuar dhe i dënuar si vrasës i ish-kryeministrit Zoran Xhingjiç.
Në një inervistë të dhënë për të përditshmen Kurir, Nikoliç ka përdorur një gjuhë të drunjtë, duke e cilësuar dënimin e famëkeqit Legija, ish-komandant i trupave speciale të xhandërmarisë si “të motivuar politikisht”.
Nën një atmosferë që është në fakt pjesë e zgjedhjeve presidenciale, ku Nikoliç do të jetë kandidat i partisë në pushtet, ai ka kundërshtuar punën aktuale të komisionit hetimor parlamentar për vrasjen e ish-kryeministrit Xhingjiç.
“Nuk mundet që një vrasje të zbulohet nga parlamenti, por duhen inspektorë dhe policë të trajnuar e të shkolluar si dhe prokurorë të mire”, tha Nikoliç që më pas nxori atë për të cilën ka dëshiruar të flasë.
Nikoliç tha që vendimi kundër Milorad Ulemek, i quajtur Legija, ishte i motivuar politikisht dhe shtoi se, “e vërteta mbi vrasjen e kryeministrit nuk është zbuluar dhe ka se qenë pjesë e një spekulimi politik.
Presidenti serb deklaroi se as qeveria e as prokuroria nuk janë munduar të nxjerrin të vërtetën.
Legija dhe grupi i tij është akuzuar dhe dënuar si autorë të vrasjes së Zoran Xhingjiçit, i cili u qëllua sapo dilte nga Kryeministria më 29 shtator 2002.
Legija dhe grupi i tij i forcave speciale u emërtua si “Klani i Zemunit”, një zonë turistike në Beograd, në breg të Danubit.
“Klani i Zemunit” arriti të blejë shumë prona në Zemun, duke administruar paratë e krimit të organizuar, kumarit, trafikut të drogës dhe porostitucionit. Ata i morën pronat nga qeveria e Millosheviçit dhe që u përdorën nga ky i fundit për vrasje politike dhe masakra etnike.
Deklarata e sotme e presidentit Nikoliç është cilësuar si një përpjekje për të marrë votat që mund t’i tërheqë Vojisllav Sheshel, i cili në zgjedhjet parlamentare u rendit partia e tretë në vend.
Zgjedhjet parlamentare serbe do të zhvillohen në pranverën e vitit 2017.
Por gjithsesi një deklaratë bombastike e thënë nga kreu i shtetit serb, rrezikon të kompromentojë të gjitha hetimet për vrasjen e Zoran Xhingjiçit, pasi presidenti është edhe kryetari i trupës që emërtojnë shefat e gjykatave dhe prokurorive.
Xhingjiç u eleminua pikërisht pas dorëzimit demonstrativ në Hagë të ish-presidentit Sllobodan Millosheviç, pas një aksioni spektakolar të policisë serbe.
I vetmi pasues besnik i Xhingjiçit në politikën serbe është Çedomir Jovanoviç, kreu i Partisë Liberale, i cili bën thirrje për njohjen e pavarësisë së Kosovës dhe braktisjen e aleancës me Moskën.
Jovanoviç është sulmuar disa herë dhe është plagosur në këmbë.
Një skenar paraprak e shikonte Jovanoviçin në një qeveri koalicioni me Aleksandër Vuçiçin, por me ndërhyrjen e Moskës u rikthye sërish Ivica Daçiç, pasuesi legal i Sllobodan Milosheviçit në Partinë Socialiste të Serbisë. /tesheshi.com/
