Nikoliç kërcënon Europën: Nëse Kosova është kusht, nuk e duam BE-në

Shpërthen Presidenti serb, Tomislav Nikoliç. Pikërisht në prag të vizitës së tij në Rusi, kreu i Beogradit ka sulmuar ashpër Bashkimin Europian.

“Nëse BE-ja ka kusht njohjen e Kosovës nga Serbia, atëherë nuk duam të pranohemi në Europë”, deklaroi Nikoliç për gazetën Danas.

Por kjo nuk është e vetmja “kumbull” që ka këputur nacionalisti që drejton Serbinë.

Madje ai ka sulmuar Europën duke e cilësuar të paaftë të përballojë kriza si ajo e emigrantëve, por edhe dialogun Beograd-Prishtinë.

“Kanë qenë të njëanshëm pra me Prishtinën duke zbatuar kërkesat e tyre dhe ndaj jam i shqetësuar”, tha Nikoliç për Danas.

Nikoliç ka paralajmëruar Brukselin që të ndërhyjë menjëherë për të themeluar Zajednicën në Kosovë, përndryshe Beogradi do të mbajë qëndrim.

“Çfarë duhet të bëjmë ne?! Nëse Prishtina nuk do të zbatojë atë që ka firmosur, atëherë duhet të kundërpërgjigjemi. Kjo situatë do të jetë një test i madh për Aleksandër Vuçiçin.

Ai më pas akuzoi Hagën se ka pasur një standard të ndryshëm për serbët dhe për shqiptarët. :Ata dënojnë më ashpër serbët”, tha Nikoliç, i cili harron se është Serbia ajo që ka kryer genocide dhe jo anasjelltas.

/tesheshi.com/