Tomislav Nikoliç, ish-presidenti i Serbisë ka “shpërthyer bombën” sot në Banja Luka, ku ka kërkuar pavarësinë e territorit që administrojnë serbët nga Bosnja Hercegovina.
Siç bën të ditur B92, Nikoliç ka qenë i ftuari i nderit i presidentit të Republika Srbska-s në “ditën kombëtare” të serbëve të Bosnjës, e cila u vendos një vit më parë me referendum.
Milorad Dodik ka dekoruar ish-presidentin serb me një sfond shokues: harta e Republika Srbska-s ishte e shkëputur nga territori i Bosnjë-Hercegovinës, duke thyer kështu Marrëveshjen e Dayton-it dhe prekur kufijtë në Ballkan.
Nikoliç, në fjalimin që ka mbajtur në ceremoni deklaroi se “nëse rruga jonë drejt bashkimit është autonomia dhe pavarësia, unë ju uroj juve që të arrini autonominë dhe pavarësinë. Nuk duhet të ketë devijim nga kjo rrugë. Do të ketë qindra pengesa, por ne jemi nga ata popuj që ecim vetëm përpara dhe të jetë e qartë se Serbia dhe Republika Srbska do të vendosin bashkimin së bashku”.
Ish-Presidenti serb i cili është kryetar i Këshillit të Bashkëpunimit të Serbisë me Rusinë dhe Kinën, deklaroi se “një pjesë e komunitetit ndërkombëtar do t’i heqë Serbisë sovranitetin dhe pavarësinë, por tani nuk kanë ku të shkojnë, ata do të pranojnë të drejtën e Republika Srbska-s për të zgjedhur që të bashkohet me Serbinë”.
9 janari si datë përkujtimore është cilësuar si “antikushtetuese” nga Gjykata Kushtetuese e Bosnjë-Hercegovinës dhe të gjithë aktivitetet e sotme janë konsideruar si të jashtëligjshme.
Përveç Nikoliçit, Dodik dekoroi dhe regjizorin Emir Kusturica dhe zv.kancelarin austriak, Hans Christian Strache. /tesheshi.com/
