Presidenti i Serbisë, Tomislav Nikoliç, ka rimarrë sulmin e zyrtarëve serbë kundër Bashkimit Europian, duke e përforcuar atë.
Gjatë një fjalimi të mbajtur para ushtrisë me rastin e 9 majit, në Zrenjanin, në pjesën veriore të Serbisë, ai u bëri thirrje krerëve të BE-së që t’i përgënjeshtrojnë deklarimet e disa zyrtarëve se Serbia do të hyjë në Bashkimin Europian atëherë kur ta njohë Kosovën.
“Disa përfaqësues të BE-së po thonë vazhdimisht se Serbia nuk mund të hyjë në BE pa i njohur Kosovën dhe Metohinë. Nëse këtë duan ata, atëherë nuk duam ne. Ne duam të hyjmë në Bashkimin Europian së bashku me Kosovën si pjesë e Serbisë, dhe jo të cunguar,” e ka ngritur zërin Nikoliç para ushtarëve që brohoritnin për lavdinë serbe.
Presidenti serb e ka paralajmëruar kryeministrin e vendit të tij, Aleksandër Vuçiç, në një intervistë për rusen Sputnik, se nuk duhet të tentojë ta ndryshojë Kushtetutën e Serbisë, për të hequr preambulën e saj ku thuhet që “Kosova është pjesë e Serbisë”.
Ndërkaq, duke folur për Tanjug-un, Nikoliç është shprehur: “Do të kem konsultime me kryeministrin Vuçiç, dhe gjithçka do të varet nga sjellja e tij në administrimin e 126 votave që ka marrë për të qeverisur.”
Ky është një paralajmërim i hapur që të mos e ndryshojë Kushtetutën, siç ka premtuar Vuçiç.
“Unë nuk kam parë shenja se synohet të ndryshohet Kushtetuta, por di që me siguri nuk do të guxohet të ndryshohet preambula e saj ku theksohet se Kosova është pjesë e Serbisë. Sikur të kërkohet nga e gjithë bota, Serbia nuk do të lejojë askënd të prekë pjesët e saj të pandara,” ka deklaruar presidenti serb në portalin shtetëror rus Sputnik News. /tesheshi.com/
