Ka shkaktuar furtunë në Serbi deklarata e presidentit të vendit, Tomislav Nikoliç për të ruajtur në një bankë speciale qelizat genetike të serbëve, në mënyrë që të ruajë të paprekur kodin gjenetik dhe racën sllave.
Siç bën të ditur B92, Nikoliç ka rimarrë sërish këtë fenomen diskutim.
“Kombi serb është në krizë, prej 20 vjetësh çiftet bëjnë vetëm një fëmijë. A e dini ku po shkojmë kështu? Po na e marrin të tjerët”, ka thënë ai gjatë një fjalimi në një qendër të gjenetikës në Kragujevc.
Në fakt ky debat në Serbi bëhet prej shekujsh ku ata akuzojnë shqiptarët se lindin shumë fëmijë dhe për këtë, herë pas here kanë implementuar spastrimin etnik apo asimilimin në masë me vrasje dhe largim.
Ndërsa duke folur për televizionin Pink, Nikoliç tha se kodin gjenetik e kemi prej të parëve tanë dhe duhet ta trashëgojmë duke ruajtur të pastra karakteristikat tona. Përndryshe, çdo gjë mund të ndodhë, sepse ekspertët paralajmërojnë se po sulmohemi në mënyrë të heshtur në aspektin demokrafik”, ka shtuar ai.
Por këto deklarata janë quajtur si “raciste dhe ksenofobe” nga ana e opozitës së majtë të cilët kanë kërkuar dorëheqjen e presidentit serb.
Ndërsa Nikoliç e kundërshtoi duke theksuar se “Kush jam unë që mund të dal kundër popullit serb që më ka votuar për 5 vjet dhe jo për 4”.
Duke folur pra për (mos)lindjet në Serbi, ai ka shtuar askush nuk dëshiron të flasë për këtë problem që ekziston dhe situata po shkon keq e më keq. “Sipas statistikave, që para 20 vjetësh, çdo çift i martuar, në 12 vitet e para ka bërë vetëm një fëmijë, ndërsa sot është edhe më keq. Kur hapim këtë temë do të të keqkuptojnë gjithmonë, por e vërteta duhet thënë”.
Ndërkaq, Nikoliç ka kërkuar nga qeveria e tij që gjatë negociatave të pritshme me Prishtinën në Bruksel të vendosë kusht lirimin e Oliver Ivanoviçit duke e konsideruar dënimin e tij një “balancim të kotë” para nisjes së punës së Gjykatës Speciale.
Duke u futur në politikën e brendshme të Kosovës, Nikoliç i ka cilësuar “farsë dhe teatër” protestat e dhunshme në Prishtinë.
“Kjo bëhet vetëm e vetëm për të mbajtur Isa Mustafën dhe Hashim Thaçin në pushtet”, deklaroi Nikoliç për televizionin Pink, ku shtoi se “Zajednica” do të rrisë cilësin e jetës së serbëve në Kosovë.
Presidenti serb ka sulmuar edhe kancelaren gjermane Angela Merkel, e cila ka paralajmëruar rrezikun e konflikteve të reja në Ballkan si pasojë e garës së armatimeve.
“Nuk do të ketë luftë mes nesh, por armatosja e kroatëve nuk është e mirë”, tha Nikiloç, i cili duke folur për vendet e rajonit e ka cilësuar Maqedoninë si një “vend të varfër”, ndërsa Malin e Zi si një “shtet arrogant”.
Përgatiti: Ylli Pata – /tesheshi.com/
