Përjashtimi i prodhuesit të pajisjeve Adidas, si partner i kombëtares gjermane të futbollit, në favor të amerikanes Nike shkaktoi polemika të mëdha në Gjermani, madje edhe në radhët e autoriteteve, ku dënohet mungesa e patriotizmit.
Federata Gjermane e Futbollit (DFB) shkaktoi një tronditje të vërtetë, duke njoftuar vendimin për partneritet me kompaninë amerikane Nike për periudhën 2027-2034, duke i dhënë fund më shumë se 70 viteve besnikëri ndaj bavarezit Adidas. Njoftimi vjen më pak se tre muaj para fillimit të Kampionatit Evropian të Futbollit në tokën gjermane, raporton AFP.
Në Gjermani, e cila është në rënie ekonomike, dëbimi i Adidas errëson më tej tablonë, pasi ndërkohë një tjetër simbol i industrisë gjermane ngriti pluhurin – prodhuesi i makinave Volksëagen u hoq si partner i turneut në favor të rivalit kinez BYD.
E vështirë të imagjinohet një fanellë pa tre vija
“Vështirë se mund ta imagjinoj një fanellë gjermane pa tre vijat e markës gjermane Adidas”, ka reaguar Robert Habeck, ministri i Ekonomisë dhe Zv.Kancelar. “Adidas dhe zi-kuq-verdhë, ngjyrat e flamurit gjerman, kanë qenë gjithmonë të pandashme për mua, si pjesë e identitetit gjerman. Do ta vlerësoja pak më shumë patriotizmin vendas”.
Zhgënjimin e ka shprehur edhe ministri i Shëndetësisë, socialdemokrati Karl Lauterbach. Zgjedhja e një kompanie amerikane për pajisjen e Mannschaft u gjykua në Platformën X si një gabim, duke u ankuar se “tregtia shkatërron një pjesë të atdheut dhe traditës”.
“Futbolli gjerman ka qenë gjithmonë pjesë e historisë ekonomike gjermane. Kombëtarja që luajti me tre vija, ishte e qartë sa topi ishte i rrumbullakët dhe loja zgjat 90 minuta”, tha Markus Soeder, kryeministër i Bavarisë, ku është selia e Adidas.
Mosmiratimet janë përhapur në të gjithë vendin
Dhe jashtë qarqeve politike, mosmiratimet janë të përhapura në të gjithë vendin.
“Kjo ka të bëjë me paratë”, kritikon revista me ndikim Der Spiegel, ndërsa mediat e pakonfirmuara flasin për një kontratë 100 milionë euro në vit. Megjithatë, Bild ishte një nga të paktët që miratoi marrëveshjen, duke theksuar vështirësitë financiare të DFB. “Tradita nuk i paguan faturat”, pohon gazeta.
DFB kishte parashikuar tashmë reagime negative. “Ne e kuptojmë çdo emocion. Ndarja me Adidas nuk na lë të ftohtë, por Nike prezantoi ofertën më të mirë ekonomike”, njofton DFB në rrjetin X.
Përveç kontratës me Nike, DFB njoftoi edhe një kontratë me platformën Tik Tok, të zhvilluar nga kompania kineze ByteDance, e cila do të bëhet “partneri zyrtar i argëtimit” i kombëtares së meshkujve.
Njoftimi vjen si një tronditje për Adidas disa ditë pas zbulimit të koleksionit të fanellave EURO, duke përfshirë një me një tranzicion rozë dhe vjollcë që bëri bujë në vend, thekson gazeta Sueddeutsche Zeitung. /tesheshi.com/
