Një prej kompanive më të njohura në botë të veshjeve sportive, Nike, po bën gati të nxjerrë në treg një produkt të ri, të kushtuar posaçërisht sportisteve muslimane.
Nike do të bëhet kështu e para kompani e madhe e veshjeve sportive që prodhon një hixhab për veprimtaritë që i përkasin fushës së sportit.
Në zhvillim prej një viti, hixhabi përbëhet nga një copë e lehtë, me vrima shumë të vogla për ajrosje. I disponueshëm në tre ngjyra, ky hixhab për sportistet muslimane do të dalë në shitje në 2018-n.
Zahra Lari, një patinatore artistike, dhe që garon për Emiratet e Bashkuara Arabe, është një nga ato sportiste që ka provuar ta vërë hixhabin e bërë nga Nike.
E entuziazmuar për hixhabin, ajo ka shkruar mes të tjerash në Instagram: “Shumë krenare që jam pjesë e këtij udhëtimi të pabesueshëm.”
Të shohësh një sportiste me hixhab tani po bëhet gjithnjë e më e zakonshme. Një e tillë, Ibtihaj Muhammad, garoi vitin e shkuar në skermë për SHBA-në në Lojërat Olimpike të Rios. /tesheshi.com/
