Një tjetër gjerman shpallet kampion në Formula 1: ai është Nico Rosberg, piloti i Mercedes-it!
Garë e jashtëzakonshme kjo e fundit në Abu Dhabi, veçanërisht pesë xhirot e fundit të saj. Hamilton, Rosberg, Verstappen e Vettel kanë ndjekur njëri-tjetrin, por Ferrari i Vettel-it ka qenë çuditërisht i papërmbajtshëm.
Rosberg-ut i mjaftonte dhe vendi i tretë, por ai u bë i pasigurt kur Vettel parakaloi Verstappen-in. Hamilton, si kryesues i garës, uli ritmin, në të fundit përpjekje taktike për të krijuar kaos e për ta dëmtuar shokun e skuadrës, veçse kilometrat nuk mjaftuan për planin e tij.
Britaniku e kaloi i pari finishin, një fitore që thjesht e bëri atë fituesin e më shumë garave në këtë sezon, plot dhjetë të tillave.
Rosberg ruajti nervat në xhirot finale e doli i dyti. Me pesë pikë më tepër se Hamilton, gjermani u shpall për herë të parë kampion bote.
Vettel qe spektakolar sot, siç qe dhe Ferrari i tij. Një vend i tretë për të, që mbase dhe u përmbajt në fund, duke mos dashur t’i bëjë keq bashkëkombasit Rosberg.
Veç titullit të Rosberg-ut, në këtë garë ka ardhur dhe lamtumira e Massa-s dhe Button-it, dy prej pilotëve që kanë bërë emër në dekadën e fundit në F1.
Sezoni mbaroi, Rosberg është kampion, ashtu siç është Mercedes për konstruktorët! /tesheshi.com/
