Jo 10 por 5 milion, është shuma në euro e grabitur në Rinas pak ditë më parë. Kjo ulje “ngushëlluese” e sasisë së valutës që u vodh në mënyrë spektakolare, u përcoll si info nga ministri Lleshaj një natë më parë në Real Story.
“Nga informacionet që kam unë, shifra që është grabitur është rreth 5 milion euro”, tha kreu i Rendit gjatë një interviste në studion e Sokol Ballës.
Ai edhe njëherë ja ka përcjell përgjegjësinë e asaj që ka ndodhur konçensionarit kinez të Rinasit.
“E përsëris që përgjegjësinë maksimale e ka konçesionari. Mos harroni që çdo pasagjer paguan 3 euro për çdo lëvizje që bën nëpërmjet Rinasit.
Për çfarë shpenzohen këto para? A kanë qenë në shërbim të sigurisë? Natyrisht, në disa aspekte kjo gjë duhej të ishte kontrolluar edhe nga Aviacioni Civil. Por ka pasur frymë refuzuese dhe aspak bashkëpunuese nga konçesionari.
Madje ne nuk kemi pasur akses as në dhomat e kamerave të sigurisë. Ka pasur mungesë gatishmërie për transparencë. Mungesa e dëshires për bashkëpunim nga konçesionari është aq e dukshme sa që ka shkuar ne nivele irrituese”, theksoi Lleshaj. /tesheshi.com/
