Ministrat e jashtëm të vendeve të Bashkimit Europian treguan pak dëshirë për ta shtuar më tej presionin ndaj Rusisë për Ukrainën, duke parapëlqyer t’i japin një mundësi armëpushimit të brishtë përpara se të vendosin nëse duhen vënë sanksione të tjera apo të zgjerohen ato ekzistueset. Pjesa më e madhe e ministrave në takimin e BE-së në kryeqytetin letonez i mbështetën të gjitha shpresat e tyre te marrëveshja e fundit e Minskut, dhe u shprehën se BE-ja duhet të marrë në konsideratë shtrëngimin e sanksioneve nëse armëpushimi shkelet seriozisht.
Ndërkaq, si Kievi dhe separatistët pro Rusisë kanë akuzuar njëri-tjetrin për dhunë që kur marrëveshja e paqes e muajit të fundit pati si pikë të saj largimin e armëve të rënda nga fronti në Ukrainën lindore.
Ndërsa vendet e Bashkimit Europian janë të pavendosura për t’i vënë sanksione të reja Rusisë, por vazhdojnë zbatimin e sanksioneve aktuale, Kina bashkëpunon me këtë të fundit. Vendi aziatik shprehu të dielën gatishmërinë për të bërë përpara në bashkëpunimin ekonomik dhe politik me Rusinë, pavarësisht sanksioneve perëndimore kundër Moskës për konfliktin me Ukrainën, duke theksuar se marrëdhëniet e tyre janë të bazuara në një “nevojë të ndërsjelltë”. Të dyja vendet janë anëtare të përhershme të Këshillit të Sigurimit të OKB-së, ku në të shkuarën kanë vënë së bashku veton ndaj iniciativave të mbështetura nga Perëndimi, si në lidhje me luftën civile në Siri. /tesheshi.com/
