Temperaturat rekord të shënuara këtë vit në vendet prej Marokut e deri në Arabinë Saudite dhe më tutje, mund të jenë paralajmërim për “ferrin e vërtetë në tokë” që pritet pritet të vjen në vitet në vijim, njoftojnë ekspertët për klimatologji.
Siç shkruan Washington Post, në vitet e ardhshme, Lindja e Afërt pritet të goditet nga mungesa e ujit, temperatura të cilat do të jetë vështirë të përballueshme dhe pasoja tjera të ngrohjes globale.
“Nëse kjo do të ndodhë, konfliktet dhe krizat me refugjatë do të jenë shumë më të rënda sesa këto të tanishmet”, ka thënë zyrtari i lartë i OKB-së për vendet arabe, Adel Abdelatif, i cili ka vite që studion ndikimin e ndryshimeve klimatike në rajon.
Në Emiratet e Bashkuara Arabe dhe Irak gjatë këtij viti është regjistruar indeksi rekord i të nxehtit.
Në Xhedah të Arabisë Saudite janë arritur temperatura deri 52 gradë, kurse në Basra 54, po aq sa dhe në Mitribah të Kuvajtit.
Këto nivele janë konfirmuar edhe nga ato Organizatës Botërore Meteorologjike, të cilat edhe zyrtarisht konsiderohen si rekorde në hemisferën lindore.
“Të dalësh përjashta është sikur të ecësh nëpër zjarr”, thotë Zainab Guman, studentja 26-vjeçare e cila jeton në Basra. “Ke ndjenjën se çdo gjë në trupin tënd-lëkura, sytë, hunda-po fillon të digjet”, thotë ajo.
Bassem Antoine, ekonomist irakian, thotë se moti ka dëmtuar seriozisht edhe ekonominë e vendit.
Autoritetet vendore tashmë kanë shpallur festa të shumta të detyrueshme zyrtare për shkak të nxehtësisë. Edhe përkundër kësaj, shumë punëtorë shfaqen në punë, ngase aty është edhe vendi i vetëm ku mund të gjejnë kondicionerë. Gjatë ditës, rrugët e qyteteve të mëdha janë të zbrazura tërësisht, ndërsa për shkak të nxehtësisë ekstreme, banorët nuk kanë rrymë me orë.
Spitalet në anën tjetër janë stërmbushur me njerëz që vuajnë nga dehidrimi dhe rraskapitja për shkak të të nxehtit.
Një studim i publikuar në gazetën Nature Climate Change në tetor, ka paraparë që temperaturat do të ngrihen aq shumë në Gjirin Persik, sa që do të rrezikohet edhe ekzistenca në këto pjesë të globit deri në fund të këtij shekulli.
Studiuesit në Institutin për kimi, Max Planck dhe Instituti i Qipros në Nikosia, kanë paraparë një fat të ngjashëm edhe me Lindjen e Mesme dhe Afrikën Veriore, vende këto që janë shtëpi e gjysmë miliard banorëve.
“Qeveritë e rajonit në përgjithësi nuk janë të përgatitura për t’u marrë me një popullësi në rritje të shpejtë dhe ndërrime klimatike si këto”, thotë Francesca de Chatel, ekspert për çështje të ujit në Lindjen e Mesme, me seli në Amsterdam.
“Për vitet të tëra, thotë ajo, ata kanë dështuar për t’i adresuar këto probleme në mënyrën e duhur, pavarësisht paralajmërimeve nga ekspertët për çështjet klimatike dhe agjencive të OKB-së, por tani mund të jetë vonë”.
OKB parasheh që popullata e 22 vendeve arabe do të rritet prej 400 milion në 600 milion banore në vitin 2050. Kjo do t’i vendoste në stres të madh vendet në të cilat shkencëtarët që merren me çështje klimatike parashohin reshje dukshëm më të ulëta dhe kriposje më të madhe të ujërave nëntokësore nga rritja e nivelit të detit. Tashmë, shumica e vendeve në rajon pritet të përballen me kriza akute të ujit për shkak të klimës së thatë, konsumit të shtuar dhe praktikave të dëmshme bujqësore.
Përgatiti: Jeton Zenuni – /tesheshi.com/
