I nxehti që theu çdo rekord e që e bëri vitin 2016 më të nxehtin në historinë e regjistruar të njerëzimit, ka vijuar edhe gjatë këtyre muajve të vitit 2017, duke e shtyrë botën drejt një “territori vërtet të panjohur”. Ky është konkluzioni që del nga raporti për klimën të organizatës Botërore Meteorologjike, publikuar këtë javë.
Sipas vlerësimit të ekspertëve është shënuar një rritje e paprecedent e nxehtësisë në të gjithë globin, hollim i jashtëzakonshëm i shtresës së akullit në të dyja polet dhe rritje e nivelit të detit.
Vlerësimet e OBM-së për klimën, 2016 theksojnë se ngrohja globale po nxitet gjerësisht nga emetimet prej aktivitetit njerëzor, por fuqia e El Niño – një cikël klimaterik natyror – rriti nivelin e të nxehtit gjatë vitit të kaluar. El Niño tashmë është në largim, por vijoi të regjistrohet mot ekstrem me temperatura rekord në Shtetet e Bashkuara gjatë shkurtit të këtij viti dhe valë të nxehti në Pole që po shkrijnë akoma edhe më shumë shtresat e akullit.
“Edhe pa një El Niño të fuqishëm në vitin 2017, ne kemi vëzhguar ndryshime të tjera domethënëse në të gjithë planetin që po sfidojnë kufijtë e kuptueshmërisë sonë për sistemin klimaterik të planetit. Ne jemi tashmë në një territor vërtet të panjohur”, tha David Carlson, drejtor i programit të kërkimeve mbi klimën botërore në OBM.
“Toka është një planet në trazira për shkak të ndryshimeve të shkaktuara nga njeriu në atmosferë”, tha Jeffrey Kargel, studiues i akullnajave në universitetin e Arizonës në Shtetet e Bashkuara. “Në përgjithësi, kushtet që po ndryshojnë në mënyrë drastike nuk e ndihmojnë civilizimin, që lulëzon vetëm me stabilitet”.
Raporti i OBM është “befasues”, sipas profesorit David Reay, ekspert i emetimeve në universitetin e Edinburgut: “Nevoja për veprim të bashkërenduar është tani më urgjent se kurrë ashtu sikundër rreziqet nuk kanë qenë kurrë më të mëdha”.
Raporti i ri i OBM-së gjithashtu, ka nxitur disa shkencëtarë të kritikojnë Donald Trump-in. “Ndërsa të dhënat tregojnë një ndikim gjithnjë e më të madh të aktiviteteve njerëzore në sistemin e klimës, administrata Trump dhe republikanë të lartë në Kongres vazhdojnë të fshehin kokën në rërë”, tha profesori Sir Robert Watson, një shkencëtar i mirënjohur për klimën në universitetin e Anglisë Lindore dhe ish-kreu i panelit special të OKB-së për klimën.
“Fëmijët dhe nipërit tanë do të hedhin vështrimin pas mbi mohuesit e ndryshimeve klimaterike dhe do të pyesin sesi ka mundësi që ata të sakrifikonin planetin për hir të energjisë më të lirë nga fosilet, kur kostoja e mosveprimit tejkalon koston e tranzicionit drejt një ekonomie që do të emetonte sasi të ulëta karboni”, tha Watson.
Viti 2016 njohu mesataren më të nxehtë globale që kur kanë nisur matjet me termometër në vitin 1880. Por kërkimet shkencore tregojnë se bota ka qenë për herë të fundit kaq e nxehtë rreth 115 mijë vjet më parë dhe se planeti nuk ka përjetuar nivele kaq të larta të dioksidit të karbonit në atmosferë për rreth 4 milionë vjet.
Viti 2017 ka njohur vijimësi, pasi në SHBA shkurti ishte më i ngrohtë se zakonisht, dhe në Australi, moti ekstremisht i nxehtë ka zgjatur shumë duke goditur shumë shtete. Pasojat kanë qenë veçanërisht të dukshme në polet e planetit.
Përgatiti: Juli Prifti – /tesheshi.com/
