Nën kujdesin e emirit të shtetit të Katarit, Sheikh Tamim bin Hamad Al-Thani, në Qendrën e Ekspozitave dhe Kongreseve (DECC) në Doha u hap Panairi i 32-të Ndërkombëtar i Librit, i cili do të zgjasë deri më 21 qershor të këtij viti.
Në këtë aktivitet u mblodhën më shumë se 500 botues nga 37 vende të botës dhe në ditët në vijim do të prezantohet një program i pasur dhe i larmishëm kulturor.
Panairi, i cili mbahet me sloganin “Ngrihemi duke lexuar”, u hap nga kryeministri dhe ministri i Jashtëm i Katarit, Sheikh Mohammed bin Abdulrahman bin Jassim Al-Thanim dhe u vizitua sot nga Emiri i Katarit.
Sundimtari i Katarit vizitoi disa pavione panairesh, duke përfshirë pavijonin e Arabisë Saudite, mysafir nderi i këtij manifestimi, si dhe pavijonet e Sulltanatit të Omanit, Shtetit të Kuvajtit dhe SAB (Autoriteti i Librit Sharjah) nga Emiratet e Bashkuara Arabe, njofton agjencia shtetërore e Katarit QNA.
Emir Al-Thani shkëmbeu mendime me drejtuesit e panairit “për rëndësinë e leximit dhe promovimin e shkëmbimit kulturor midis popujve dhe qytetërimeve”.
Gazetat e Katarit në edicionet e sotme i kushtojnë shumë rëndësi kësaj ngjarjeje, duke e cilësuar panairin një “fener kulturor” që përmirëson pozicionin e Katarit në nivel rajonal dhe ndërkombëtar.
Ngjarja e spikatur kulturore, nënvizojnë ata, po mbahet pasi Katari priti Kampionatin Botëror historik të Futbollit, një nga më të mirët e zhvilluar ndonjëherë, me të gjitha dimensionet, për t’i shtuar dimensione të reja arritjeve kulturore dhe civilizuese të Katarit, sipas gazetës Al-Sharq.
Gazeta nënvizon mesazhin e kryeministrit dhe ministrit të Punëve të Jashtme, Mohammed bin Abdulrahman bin Jassim Al-Thani, se shteti i Katarit gjithmonë ka kërkuar ta bëjë Panairin e Librit të Dohas një hapësirë që mbledh shkrimtarë, intelektualë dhe lexues, me qëllimin për të promovuar lëvizjen kulturore kombëtare dhe pozicionin e vendit në komunitetin kulturor global.
Në skenën kryesore të panairit, krahas mbrëmjeve të poezisë mbahen dhe 37 seminare kulturore, shkencore, letrare dhe shoqërore, ndërsa në sallën e kulturës 116 evente të ndryshme, duke përfshirë takime kulturore dhe prezantimin e botimeve të reja.
Ata theksojnë se përzgjedhja e Mbretërisë së Arabisë Saudite si e ftuara e nderit për edicionin e këtij viti është “një tjetër mundësi për të forcuar lidhjet që bashkojnë dy vendet vëllazërore”.
Nën titullin “Rilindja kulturore”, gazeta Al-Watan thekson se kultura ka qenë gjithmonë një prioritet për Katarin, si një “fener iluminimi”, një mjet përparimi dhe një faktor kryesor në vendosjen e identitetit kombëtar.
Konsolidimi i kulturës së Katarit, përfundon Al-Watan, me këtë ngjarje thekson “rolin kyç të dijes në rilindjen e shoqërisë së Katarit”. /tesheshi.com/
