Benzema u la jashtë kombëtares franceze për Euro 2016-tën pasi është akuzuar prej kohësh për shantazhim të Mathieu Valbuena-s, një tjetër lojtar i njohur francez.
Lojtari me origjinë algjeriane ka dhënë një intervistë ekskluzive për Marca-n spanjolle, ku ka folur për lënien e tij jashtë përfaqësueses së “gjelave”.
“Ai iu nënshtrua presionit të një partie raciste të Francës,” ka deklaruar sulmuesi i Realit të Madridit, duke iu referuar Didier Deschamps-it, trajnerit të përfaqësueses franceze.
“Duhet ta dini,” i ka thënë Benzema gazetarit, “se një parti ekstremiste ka arritur në raundin e dytë në dy zgjedhjet e fundit në Francë.”
Benzema lë të kuptohet se e ka fjalën për Frontin Nacional të ekstremit të djathtë, që mori thuajse 30 për qind të votave në zgjedhjet rajonale të dhjetorit të shkuar.
Ka patur shumë presion, sigurisht, sepse disa gazetarë kanë thënë në televizion gjëra që nuk janë të vërteta, ka vijuar sulmuesi madrilen.
“Do të doja të luaja për vendin tim, por kjo fatkeqësisht është e pamundur.”
I munguari në kombëtaren franceze thotë se nuk e kupton në terma sportivë se pse është jashtë përfaqësueses.
“Në nivelin gjyqësor, unë nuk jam gjykuar. Nuk jam fajtor, kështu që duhet të presim çfarë do të thotë drejtësia.” /tesheshi.com/
