Nga Bashkim Kastrati
Në Lumin Mirusha gjatë ditës së djeshme është parë një numër i madh i peshqve të ngordhur. Sipas zyrës për informim të Komunës së Malishevës, shkaqet e kësaj ngordhje të peshqve ende nuk dihen, ndërsa inspektorët komunal janë në terren duke u marrë me rastin. .
Me të marrë informacionin nga shoqata e peshkatarëve sportiv “Sykuqi”, inspektorët komunal kanë dalë në vendngjarje dhe janë duke u marrë me rastin, të cilët i kanë njoftuar edhe organet qendrore, ndërsa në vendngjarje, së bashku me shoqatën e peshkatarëve, është edhe policia.
“Lidhur me ngjarjen ka reaguar edhe kryetari i Komunës së Malishevës, Ragip Begaj, i cili ka kërkuar ndriçimin e rastit dhe gjetjen e shkaktarit të kësaj ngjarje të rëndë, të cilën e ka vlerësuar si katastrofë ekologjike dhe ka kërkuar ndihmën e organeve qendrore, përkatësisht të ekspertëve të kësaj fushe”, thuhet thotë zyra për informim e kësaj komune.
Edhe shoqata e peshkatarëve sportiv ka kërkuar ndriçimin e rastit dhe gjetjen e shkaktarit të kësaj ngjarje me dëme të pazëvendësueshme.
Për shkak të ngordhjes së pazakontë të peshqve në lumin “Mirusha”, kryetari i Komunës së Malishevës, drejtoria e Inspektoratit në Malishevë dhe shoqata e peshkatarëve sportiv e kësaj komune, kanë apeluar tek të gjithë peshkatarët dhe banorët që jetojnë përgjatë rrjedhës së lumit “Mirusha”, përfshi edhe liqenin në fshatin Mirushë, që të mos peshkohet dhe të mos merren peshqit.
“Përderisa organet përgjegjëse të dalin me një deklarim rreth shkakut të ngordhjes së peshqve, apelohet që të mos peshkohet apo të merren peshqit. Në mënyrë të veçantë, kërkohet nga prindërit, që mos t’i lejojnë fëmijët që të marrin peshk nga lumi apo liqeni. Komuna është duke i marrë të gjitha masat e nevojshme në mënyrë që të pastrohet lumi”, thotë zyra për informim e Komunës së Malishevës.
Bëhet e ditur se mostrat e ujit janë dërguar për analiza dhe pritet konfirmimi i shkaqeve të ngordhjes së peshqve, prandaj, derisa të dalin analizat dhe derisa organet kompetente të dalin me një përfundim zyrtar, udhëheqësit e komunës, lutin qytetarët dhe peshkatarët të bëjnë kujdes.
Me këtë rast është duke u marrë edhe Policia e Kosovës.
Dyshohet se deri të ngordhja e peshqve ka ardhur për shkak të ndotjes së ujërave, hedhjes së derivateve, kiselinës apo tjera materialeve tjera kimike.
Në lidhje me këtë rast ka reaguar edhe Federata e Peshkatarëve të Kosovës, ata kanë kërkuar reagim të menjëhershëm institucional dhe kanë kërkuar kujdes nga banorët, që mos t’i marrin peshqit e ngordhur dhe t’i mbajnë fëmijët larg lumit dhe peshqve të ngordhur, pasi që mund të paraqesin rrezik serioz për shëndetin. Nga kjo shoqatë u bë e ditur se një dukuri e tillë, nuk ka ndodhur ndonjëherë në lumin “Mirusha”.
Ministria e Mjedisit dhe Planifikimit Hapësinor (MMPH), ka njoftuar se lidhur me dukurinë e paraqitjes së ngordhjes së peshqve në rrjedhën e lumit Mirusha dhe atë në lokacionin nga Banja e Malishevës, është duke ndërmarrë masat e nevojshme për të vërtetuar shkaqet e ngordhjes së peshqve.
Sipas njoftimit të MMPH-së, inspektorati i ujërave që funksionon në kuadër kësaj ministrie, bazuar në prezencën e inspektorit komunal në vend ngjarje, ka udhëzuar inspektorin që t’i marrë mostrat e ujit nga lumi i Mirushës për analiza të mëtejme të ujit nga lumi Mirusha për të identifikuar shkaqet e paraqitjes së ngordhjes së peshqve.
Në këtë aspekt Instituti Hidrometeorologjik i Kosovës pas pranimit të mostrave të ujit nga vendi i ngjarjes është duke bërë analizat në laborator për të verifikuar nëse cilësia e ujit ka ndikuar në ngordhjen e peshqve.
Rezultatet mbi cilësinë e ujit do të raportohen pas përfundimit të analizave laboratorike të mostrës së sjellë në Institut.
“MMPH do t’iu mbajë të informuar në lidhje më këtë rast, dhe njëkohësisht inkurajon qytetarët që të bashkëpunojnë me organet përgjegjëse për të çdo informacion në lidhje me shkaqet që mund të kenë shkaktuar këtë fenomen”, thuhet në reagimin e MMPH-së. /tesheshi.com/
