Nga Gani Gashi
24 orë pas lajmit se në lumin Sitnica në Mitrovicë kanë ngordhur me qindra peshq, nuk ka asnjë reagim nga institucionet përgjegjëse në Kosovë. Më saktë, asnjë zyrtar nga Ministria e Mjedisit dhe Planifikimit Hapësinor, apo të Agjensionit të Ushqimit dhe Veterinarisë të Kosovës si dhe Federatës së Peshkatarisë së Kosovës, nuk e kanë parë të udhës që të dalin në brigjet e lumit në fjalë, që së paku vetëm me sy të shikojnë katastrofën ekologjike që ka ndodhur në këtë lumë, qoftë dhe nga kurioziteti, pa llogaritur që kanë përgjegjësi për atë që ka ndodhur dhe për atë rehabilitimin e asaj situate.
Me ironi, një zyrtar i komunës së Mitrovicës tha se meqë është pushim vere, inspektorët e këtyre institucioneve nuk e kanë me nge që të merren me këtë katastrofë ekologjike, pasi u duket një gjë shumë e vogël.
Naim Hajra, drejtor i Drejtorisë për Inspekcionit në Mitrovicë, i ka thënë portalit tesheshi.com se “inspektorët Mjedisit si dhe ata të Veterinarisë të komunës së Mitrovicës, të hënën menjëherë pas marrjes së informacioni kanë dalë në vendin e ngjarjes.
Sipas tij, ata vetëm e kanë konstatuar këtë ngordhje masive e të tmerrshme të peshqve në Sitnicë, ashtu siç ka raportuar portali tesheshi.com” dhe se kanë arritur të marrin disa mostra, të dërguara më pas në laboratorin e Prishtinës, për të analizuar se kush janë shkaqet që kanë ndikuar në këtë katastrofë ekologjke.
Dyshimet e para flasin për një helmim të peshqve me substancën organike ‘Fenol’, ka thënë Hajra. “‘Fenoli’ është substancë që përdoret më së shumti nga termocentralet në Obiliq dhe ka dyshimi se nga kjo substancë janë helmuar peshqit që kanë ngordhur, por këtë më mirë do ta vërtetojnë analizat nga mostrat e marra që do të kryhen ditët në vijim”, ka thënë i pari i Inspekcionit në Mitrovicë.
Në anën tjetër, Gani Beshiri, anëtar i kryesisë së shoqatës së peshkatarëve të Mitrovicës, ka theksuar se në bazë të asaj çka ka parë në vendin e ngjarjes, dyshohet se kjo katastrofë ka ardhur për shkak të temperaturave të larta, pra ngrohjes së ujit si dhe ndotjes së madhe që ka lumi.
“Lumi Sitnica tani është kthyer në kolektorin kryesor të ujërave të zeza për gjysmën e territorit të Kosovës, duke përfshi këtu edhe Prishtinën”, ka thënë Beshiri, dhe ka shtuar se do jenë analizat ato që do e përvcaktojnë përfundimisht shkakun e ngordhjes masive të peshqve.
Beshiri ka apeluar tek banorët e fshatrave që kanë shtëpitë pranë brigjeve të lumit Sitnica, që për momentin të mos konsumojnë peshkun e këtij lumi deri sa të bëhen analiza e detajuara të mostrave të marra nga ky lumë. /tesheshi.com/
