Kakofonia e lajmeve të shpejta e të shumta ka shuar shpesh zhurmën e përligjur të lajmeve që vërtet vlejnë të shënohen në kalendarin e vitit që po lëmë pas. Nga politika me miratimin historik të Reformës në Drejtësi dhe zhvillimeve brenda dy partive kryesore e deri tek kualifikimi për herë të parë në Kampionatin Europian; shenjtërimi i Nënë Terezës apo arrestimi i një ish-ministri për korrupsion e deri lista e të inkriminuarve në politikë, ky vit ka rekordet e tij të ngjarjeve për shqiptarët. tesheshi.com bën një përmbledhje të ngjarjeve më të rëndësishme të këtij viti…
Nga politika:
Reforma në drejtësi
Politika e teatrit të ditës së Enjte me batuta e fyerje ka arritur që këtë vit të tejkalojë vetveten dhe të shënojë një ngjarje me rëndësi, e cila pritet t’i japë frytet e para vitin që vjen. Miratimi i Reformës në Drejtësi, një paketë ligjore e imponuar nga ndërkombëtarët pritet t’i hapë rrugë spastrimit të gjyqësorit të korruptuar shqiptar. Para votimit historik më 22 korrrik 2016 me 140 vota pro kësaj reforme i parapriu gjithashtu një takim historik mes Ramës e Bashës.
Dekriminalizimi i politikës
E nisur nga opozita nisma për drekriminalizimin e politikës arriti të kthehej më në fund në një ligj që detyronte largimin nga politika të zyrtarëve apo deputetëve me të shkuar kriminale. Më në fund prokuroria ka nxjerrë tre emrat e parë që do të bëhen kurban të pastrimit të politikës, kryebashkiakun Elvis Roshi dhe deputetët Dashamir Tahiri e Shkëlqim Selami.
Kushtetuesja pranon Vetingun
Gjykata Kushtetuese rrëzoi kërkesën e PD-së kundër ligjit të vettingut si pjesë e paketës së reformës në drejtësi. Pasi priti opinionin e Komisionit të Venecias kjo gjykatë i hapi rrugë zbatimit të ligjit më të rëndësishëm të reformës që parashikon vlerësimin e gjyqtarëve dhe prokurorëve.
Përçarje në PS
Pas një beteje kundër Ramës brenda në parti, deputetët Ben Blushi dhe Mimoza Havizi deklaruan largimin e tyre nga PS-ja për të krijuar partinë e re, Libra.
Një tjetër zhvillim nga PS-ja vjen me përjashtimin e Koço Kokëdhimës, i katapultuar në poste drejtuese nga ish-miku i tij Edi Rama.
Erë e re në PD
Partia Demokratike ka lënë në hije figurat e vjetra në kërkim të emrave të rinj. Përvjetori i kësaj partie u bë me njerëz të thjeshtë, ndërsa kryetari Basha tha se do të jetë baza ajo që do të vendosë listat e kandidatëve për deputetë.
Nga kronika:
Arrestimet e bujshme
Viti 2016 nisi me një arrestim të bujshëm, atë të ish-ministrit të PD-së, Spiro Ksera, i cili u akuzua dhe dënua për korrupsion gjatë kohës që kishte ushtuar detyrën.
Ai u dënua me 2 vjet e 6 muaj nga gjykata e Faktit, nga Apeli 2 vjet. Ksera u lirua më 19 dhjetor duke përfituar nga koha e paraburgimit.
Në muajin prill arrestohet Emiljano Shullazi, një emër i botës së krimit por i përfolur për lidhjet e tij të forta me politikën. Ai akuzua për kërcënimin ndaj kandidatit për rektor të Universitetit të Tiranës Mynyr Koni, dhe më pas dosja u zgjerua me disa denoncime për gjobvënie ndaj bizneseve.
Balili, dështimi i Drejtësisë
Drejtësia shqiptare dështoi në arrestimin e Klemend Balilit, një i shumëkërkuar nga Interpoli për trafik droge. Ai punonte si drejtor i LSI-së në Sarandë dhe ishte shfaqur pranë figurave të larta të politikës në përurimin e një hoteli të tij në këtë qytet. Dosja e Balilit nga shteti grek u mbajt për 3 javë në zyrën e Manjanit, por ministri akuzoi më pas policinë e Saimir Tahirit për mosefiçencë në arrestimin e tij. Edhe ambasadori amerikan u përfshi në këtë situatë duke akuzuar drejtësinë shqiptare për mosveprim. Loja ping-pong me këtë rast tregon se krimi dhe politika vazhdojnë t’i kenë akoma lidhjet e forta.
Dako garanton lirinë e Lul Berishës
I akuzuar për disa vrasje dhe për trafik droge, Lulzim Berisha, në vend që të kalbej në burg, përdori të gjitha lojërat me gjykatat për të ulur dënimin dhe në fund arriti të marrë dhe një garanci për punë nga kryebashkiaku i Durrësit Vangjush Dako, e cila u bë shkak që ai të dilte nga burgu.
Arrestohet kryebashkiaku i Dibrës
Kryetari i bashkisë së Dibrës Shukri Xhelili u shkarkua dhe më pas u arrestua pas publikimit të një videoje nga Oraneës ku ai shfaqej në zyrën e tij duke i kërkuar favore seksuale një vajzë në këmbim të një vendi pune.
Nga sporti:
Viti 2016 është padyshim një vit historik për futbollin shqiptar pasi për herë të parë Kombëtarja Kuq e Zi u kualifikua nëKampionatin Evropian, që u mbajt në Francë. Shqipëria mori 3 pikë, me 1 fitore dhe dy humbje duke mos e kaluar dot grupin, por i ngriti zemrat e shqiptarëve peshë.
Një lajm i keq erdhi për ekipin e futbollit “Skënderbeu”, i cili dënuar nga UEFA me përjashtim 1 vit nga kupat e Evropës dhe 100 mijë euro gjobë për trukime të ndeshjeve
Stadiumi “Loro Boriçi” në Shkodër rikonstruktohet pas një investimi në vlerën e 12 milionë eurove
Ngjarje të tjera:
Vatikani flet shqip
Në muajin tetor Papa Françesku shpalli nëshenjtore Nënë Terezën, një murgeshë me prejardhje shqiptare. Ky moment u shoqërua me një koncert në gjuhën shqipe në Vatikan.
-Po këtë vit Papa shpalli njëkardinal shqiptar. Dom Ernest Troshani, i cili ka vuajtur 27 vjet burg në komunizëm, u bë kardinali i dytë shqiptar pas Dom Mikel Koliqit.
Importi i Mbetjeve
Rikthimi i ligjit për importin e mbetjeve i cili ishte propozuar më parë nga qeveria “Berisha” shkaktoi protesat kundër qeverisë “Rama” dhe kryeministrit duke e akuzuar se kishte shkelur mbi fjalët e tij. Ligji u miratua me vetëm 63 vota, por pas kthimit nga Presidenti Nishani u la në heshtje dhe nuk u fut më në votim. Mazhoranca nuk është e sigurtë se ka votat për t’a votuar përsëri. /tesheshi.com/
