Nga Blendi Gashi
Aq larg ka shkuar papërgjegjësia institucionale në Kosovë sa që ditëve të fundit si pasojë e këaj po humbin edhe jetëra fëmijësh.
Mbytja në pus e fëmijëve dhe vdekja e tyre nga rrëzimi i shtëpive të vjetra, tregon se sa “pus” i ka punët Kosova!
Për më pak se 20 ditë, tre fëmijë kanë vdekur, një në qytetin e Prizrenit si pasojë e shembjes së një objekti të vjetër dhe dy në Prishtinë të cilët u mbytën në një gropë të hapur.
Më 6 qershor në Prizren humbi jetën Xheneta Gashi (3-vjeçare), derisa luante në afërsi të objektit ku më pas edhe është shembur duke e zënë vajzën në fjalë.
Për këtë rast në Prizren organizatat joqeveritare më 15 qershor mbajtën një protestë ku u kërkuan përgjegjësi penale.
“Kërkojmë që Kuvendi i Kosovës, konform mandatit që ka, të ftojë qeverinë e Kosovës dhe institucionet tjera në përgjegjësi për këtë tragjedi”, kërkuan OJQ-të.
Përkundër kësaj asnjë nga zyrtarët komunal të Prizrenit nuk dhanë dorëheqje, derisa asnjë fjalë nuk e tha as kryetari Ramadan Muja.
Sveçla ndijen përgjegjësi morale, dorëhiqet
Një ngjarje tjetër tragjike ndodhi dje në Prishtinë ku dy fëmijë, vëlla e motër, Florent dhe Florenta Mramori, u mbytën në një gropë me ujë në lagjen “Kolovica” të kryeqytetit.
Kjo gropë u hap dy vite më parë nga një kompani që merrte aty zhavor për të shtruar rrugët.
Edhe pse banorët e zonës disa herë paralajmëruan komunarët se jeta e fëmijëve të tyre është në rrezik nuk u ndërmorë asnjë hap.
Kështu mosreagimi nga institucionet, qoftë komunale apo Ministria e Mjedisit për mbylljen e gropës bëri që të humbën dy fëmijët e familjes Mramori.
Kjo ngjarje tragjike la të shtangur jo vetëm kryeqytetin por gjithë Kosovën.
Për dallim nga përfaqësuesit komunal të Prizrenit që nuk dhanë dorëheqje për vdekjen e vogëlushes 3-vjeçare, një gjë të tillë e bëri drejtori i Inspeksionit të Prishtinës Xhelal Sveçla.
Ai duke iu dridhur zëri në një emision televiziv në një nga mediet kosovare pranoi përgjegjësinë morale.
“Për shkak të ngjarjes tragjike në Prishtinë, me ç’rast dy fëmijë kanë humbur jetën, ndiej përgjegjësi morale që të ofroj dorëheqjen time. Unë më nuk jam drejtor i Inspeksionit. Inshalla më jep zoti force dhe shkoj për kryeshnosh në familjen Mramori dhe në varrimin e fëmijëve”, citohet të ketë thënë Xhelal Sveçla, tashmë ish-drejtor i Inspekcionit në Komunën e Prishtinës.
Dorëheqjen e Sveçlës e ka konfirmuar edhe Komuna e Prishtinës përmes një komunikate.
Pas vdekjes së dy fëmijëve nga Prishtina ka pasur reagime të shumta duke filluar nga krerët më të lartë të shtetit, partite opozitare e shoqërica civile, ku është kërkuar që përgjegjësit të vihen para drejtësisë. /tesheshi.com/
