Kampionati spanjoll vijon të mbetet epiqendër e futbollit europian, jo vetëm për atë që prodhon brenda fushës, por dhe jashtë saj.
E mërkura ka qenë një ditë e ngjeshur, me lajmërimin e Luis Enrique-s se në mbyllje të sezonit do ta lërë stolin e Barcelonës, si dhe me rezultatet e kampionatit që kanë sjellë përmbysje në kryesim.
“Kam nevojë të pushoj. Ky është motivi kryesor.” Kështu e ka përligjur vendimin e tij trajneri 46-vjeçar i katalanasve, që me mbarimin e kontratës do t’i japë fund bashkëpunimit trevjeçar.
Me të, Barcelona do të mbyllë një faqe tjetër të historisë së saj të suksesshme. Në vitin e parë në detyrë, Luis Enrique, një ish-lojtar i katalanasve, i fitoi të tre trofetë kryesorë, të kampionatit dhe të kupës në nivel vendor, si dhe të Champions League-s. Një sezon më pas u mjaftua me La Ligën dhe Kupën e Mbretit. Tani është përsëri në luftë në të tre frontet.
Dëshmi e kësaj është fitorja e një dite më parë ndaj Sporting Gijonit. Rezultati tenistik 6-1 e ngjit Barcelonën në vend të parë në klasifikim, me një pikë më shumë se Reali i Madridit.
Madrilenët, nga ana e tyre, barazuan 3-3 me Las Palmasin. Një frenim i papritur, që i kushton fort Realit, me ngushëllim të vetëm faktin se, sido që të jetë, përsëri ka një ndeshje më pak se rivalët.
Ndaj Las Palmasit mund të kishte shkuar më keq, teksa miqtë kryesonin me dy gola diferencë. Cristiano Ronaldo do ta shpëtonte skuadrën e tij me dy tundje rrjetash të minutave të fundit.
Java e 25-të e kampionatit spanjoll mbyllet me dy takimet e kësaj mbrëmjeje, Deportivo la Korunja – Atletiko e Madridit dhe Sevilja – Atletik Bilbao. /tesheshi.com/
