Ngjarja me kryetaren e LSI dhe LRI në Pukë, reagon policia

Pas pretendimeve të Lëvizjes Socialiste për Integrim, se militantë dhe drejtues të Partisë Socialiste kanë dhunuar këtë të diel kryetaren e LSI dhe atë të LRI në Pukë, ka reaguar edhe policia. Në një njoftim të shpërndarë për mediat, kjo e fundit sqaron se, ato janë ndaluar teksa udhëtonin me makinë dhe janë prezantuar si anëtare e një subjekti politik dhe kandidate për deputete. Njëra prej tyre, sqaron policia ka shfaqur gjendje të fikëti dhe për këtë arsye është dërguar drejt spitalit.

Për të sqaruar dhe analizuar veprimet e punonjësve të Policisë, në Pukë ka shkuar Zv/Drejtori Policisë Shkodër, përfaqësues të Drejtorisë së Standarteve Profesionale nga Drejtoria Përgjithshme Policisë Shtetit dhe SHÇBA. Gjithashtu, policia mësohet se ka shoqëruar dhe po merr dëshmitë e disa personave për të cilët dy gratë u kanë komunikuar drejtuesve të Policisë Shkodër se i kanë kërcënuar për motive politike.

Më poshtë njoftimi i plotë i policisë:

Fushë Arrëz, Pukë/ Nisur nga informacionet që dispononte Komisariati i Policisë Pukë për automjete që qarkullonin me xhama të errësuar dhe ofronin lekë në këmbim të votës në territorin e Njësisë Administrative Fushë Arrëz, policia lokale ka ushtruar kontrolle për të parandaluar këtë fenomen. Sot në orën 17:10 Patrulla e Përgjithshme në hyrje të qytetit Fushë Arrëz ka ndaluar një automjet tip ‘Ford’ me xhama të errësuar dhe i është kërkuar drejtuesit të mjetit dokumentacioni. Ndërkohë dy zonja që udhëtonin në automjet janë prezantuar si anëtare e një subjekti politik dhe kandidate për deputete. Pas prezantimit janë lejuar të vazhdonin lëvizjen. Por dy shtetaset kanë dalë nga automjeti dhe njëra prej tyre ka shfaqur gjendje të fikëti. Ajo është dërguar me automjet nga personat me të cilin udhëtonte në Qendrën Shëndetësore Fushë Arrëz dhe është në gjendje të mirë shëndetësore. Për të sqaruar dhe analizuar veprimet e punonjësve të Policisë në lidhje me ngjarjen është dërguar në Pukë Zv.Drejtori Policisë Shkodër, përfaqësues të Drejtorisë së Standardeve Profesionale nga Drejtoria Përgjithshme Policisë Shtetit dhe SHÇBA.