Një biznesmen kosovar, konkretisht pronari i kompanisë së ujit “Kika” nga qyteti i Kamenicës ka tentuar ta djeg vetën me një bidon benzinë, për shkak se Gjykata Themelore e Gjilanit, dega në Kamenicë, ka vendosur që mbi një pronë të tij të kalojnë telat e tensionit të lartë të rrymës të një kompanie tjetër.
Pamjet të cilat i ka siguruar Gazeta Insajderi shihet pronari Abdullah Bajra, i cili me një shkrepëse tenton t’ia vë flakën një bidoni me benzinë dhe kështu ta djegë veten.
Policia ka ndërhyrë duke e arrestuar pronarin, dy djemtë e tij.
Djali i tij, Arbnori, i cili është arrestuar në vendin e ngjarjes dhe më pas është liruar, e ka konfirmuar rastin për Insajderin.
“Sot kemi dalë për ta mbrojtur pronën tonë, të cilën synon ta tjetërsojë një kompani turko-kosovare, Erë Energy, duke i kaluar telat e rrymës së tensionit të lartë përmes pronës sonë, pa lejen tonë”, ka thënë Arbnor Bajra.
Ai ka thënë se në atë pronë kanë nisur të investojnë për kompaninë e tyre. Por, sipas tij, këtë pronë me vendim të Gjykatës Themelore të Gjilanit, dega në Kamenicë, telat e rrymës do të kalojnë mbi këtë pronë, duke ua pamundësuar investimin.
“Nëse bëhet shtrirja e atij telit, ne nuk mund të investojmë asgjë në atë pronë. Ne kemi pasur ta bëjmë aty një repart të ri për prodhimin e azotit dhe oksigjenit, sepse ne merremi me ujë, e kemi fabrikën e ujit “Kika”. Na kemi nisur pak këtë investim, e kemi rrafshuar vendin, kurse ata i kanë shtrirë telat përmes pronës dhe ne jemi t’u mundu me mbrojt”, ka shtuar ai.
Megjithatë, ai ka thënë se Gjykatës ia kanë dhënë dy opsione, të cilat nuk i ka marrë parasysh.
“Kemi qenë edhe në gjykatë, e cila e ka sjellë vendimin e njëanshëm për ata, dhe nuk i kanë marrë parasysh dy opsionet që ua kemi ofruar – ose telat të shtihen nën tokë; ose anash pronës ku nuk na pengon. Gjykata ka thënë që ata kanë të drejtë dhe na jo”, ka deklaruar Arbnor Bajra.
Zëdhënësi i policisë për rajonin e Gjilanit, Ismet Hashani, ka deklaruar se personi që ka dashur ta djeg vetën është në arrest, ndërsa djemtë e tij janë liruar. /tesheshi.com/
