Ngjarja e sotme në Tiranë, ajo kur një birbo me kartelë kriminale u fut me të kuqe në semafor dhe përplasi një çift me foshnjën e tyre 3-muajshe që po ecnin në vijat e bardha, është një tjetër tregues i një fenomeni që po haset rëndom e deri frikshëm në rrugët e Shqipërisë: makina luksoze në timonin e të cilave janë o adoleshentë pordhacë pa asnjë lidhje logjike me vlerën e automjetit, ose tipa që ja bëjnë muuu në llojin e asaj çfarë përfaqësojnë si karaktere. Një i tillë qe dhe ai i cili përpak sa nuk shkaktoi një tragjedi, pasi vetëm fati ka qenë me çiftin e foshnjën që kanë shpëtuar gjallë.
Prej sot, prej kësaj ngjarjeje, Policia Rrugore apo e Rendit duhet të ketë një prioritet: makinat luksoze, jo ato që mund të posedohen nga parelinj por normalë nga trutë e kokës dhe statusi qytetar, por nga ata që me një vështrim psikologjuizues, nga një polic me përvojë, është e qartë se përfaqëson atë që s’duhet lejuar të jetë në timon. Kjo më e pakta, pasi shumë rezultojnë dhe me probleme me ligjin. Shikojeni makinën që ka shkaktuar aksidentin. Do mjaftonte një polici e përgjegjshme, në lartësinë e detyrës, që ta ndalte dhe të dinte se nga kush drejtohet ajo. Nëse do ndodhte kjo, ai person me precedent, i quajtur Aris Sulejmani, i cili madje as ka denjuar t’u japë ndihmë të aksidentuarve por ia ka mbathur, as do guxonte të qe në timon. Edhe kjo më e pakta.
Pra, nëse Policia ka në shënjestër tipa problematikë, ata që mund të shkaktojnë gjëma rrugore si kjo e fundit në Tiranë, e ka shumë të lehtë t’i gjejë: janë në timonin e makinave luksoze. Aty i has të alkoolizuar, të droguar, madje dhe pa patentë, si kërcënim i vazhdueshëm për çdo jetë njerëzore që nuk jeton në botën e tyre hem idiote e hem kriminale.
Na e ka këtë borxh Policia, të na i heqë qafë duke jua bërë të pamundur livadhisjen rrugëve në atë që është, idiotësisht, deri dhe kafshërisht, vetë jeta e tyre: makina! /tesheshi.com/
