Në një fjalim në kuadër të 30-vjetorit jubilar të themelimit të LDK-së, kreu i saj Isa Mustafa, kërkoi nga Vetëvendosje që ta lexonte mirë rezultatin e 6 tetorit, duke përcjellë kështu mesazhin se posti i Presidentit, që është dhe ngërçi në marrëveshjen ende të paarritur mes tyre, t’i takojë kësaj force.
“Qasja jonë bashkë më LVV në Qeveri është që të ndajmë përgjegjësit baras më votën, të trajtojmë të gjitha pozitat dhe përgjegjësitë të cilat do të sfidohem gjatë mandatit katër vjeçar, dhe të sigurojmë një balance të pushtetit në mënyrë që t’i kontribuojmë demokracisë së vendit”, tha Mustafa.
Ai shpalosi dhe vizionin e bashkëqeverisjes, ku nuk harroi që të evidentonte se kanë diferenca mes tyre.
“Lidhja Demokratike e Kosovës, përkatësisht ekipi jonë dhe unë në krye të saj po bëjmë përpjekje për të arritur marrëveshje më Lëvizjen Vetëvendosje, që i siguron Kosovës një qeverisje stabile 4-vjeçare dhe arritjen e synimeve qeverisëse programore të harmonizuara mes dy subjekteve tona.
Në përpjekjet tona për të arritur marrëveshje më Lëvizjen Vetëvendosje, jemi të vetëdijshëm për dallimet tona ideologjike dhe kulturën politike si dhe për të kaluarën politikë. Por duke respektuar vullnetin e qytetarëve për ndryshim po bëjmë përpjekje të gjejmë rrugë që mund të ndjekim bashkë në qeverisje ashtu siç e gjetëm në opozitë”, ka thënë Mustafa gjatë fjalimit të tij. /tesheshi.com/
