LDK-ja e Isa Mustafës vazhdon të shprehet kundër një koalicioni të mundshëm me PDK-AAK-NISMA-n, por që thonë se do jenë organet e partisë pas certifikimit të rezultateteve që do thonë fjalën e fundit.
Nënkryetari i kësaj partie, Agim Veliu, thotë se LDK nuk do t’i bëhet patericë askujt, por shton se do të veprojnë sipas vendimit që do të sjellin organet e partisë.
“Sipas disponimit aktual ende nuk kemi vendosur, as për PAN-in, as për Vetëvendosjen. Ne do ta shqyrtojmë shumë mirë, do ta lexojmë rezultatin e këtyre zgjedhjeve dhe do të vendosim atë që është më e mira për LDK-në….Nuk do të thotë që është opsion Vetëvendosja, ne e kemi thënë që jo me çdo kusht LDK do të tentoj të hyjë në qeveri, do ta ndjek rrugën e cila është më e mira për LDK-në. Do ta marr vendimin që është më i miri për LDK-në kësaj here dhe nuk do t’i bëhet patericë askujt”, tha Veliu.
Megjithatë, sipas numrit dy të LDK-së, menjëherë pas zgjedhjeve ekziston një qëndrim i koalicionit LAA, që të mos bëjë koalicion me PAN-in.
“Jo, një mundësi është e përjashtuar, ju e dini, i keni informacionet, ai qëndrim i LDK-së nuk ka qëndruar ende, ai qëndrim është prej ditës së parë pas zgjedhjeve kur partnerët e koalicionit e kanë diskutuar dhe e kanë marr një qëndrim të përbashkët se kësaj here nuk ka koalicion me PAN-in. Kështu është qëndrimi i partnerëve të koalicionit deri sot, nuk ka asnjë ndryshim”, ka deklaruar ai për mediat kosovare.
Kujtojmë se në zgjedhjet e 11 qershorit, LDK-ja bashkë me partnerët e koalicionit, AKR-në e Behgjet Pacollit dhe Alternativën, dolën subjekti i tretë, pas koalicionit PDK-AAK-Nisma që fituan zgjedhjet dhe Vetëvendosjes që doli e dyta./tesheshi.com/
