Nga Mensur Krasniqi
Në javën që po kalon pati shumë polemika mes partive politike lidhur me modelin e sistemit zgjedhor në Republikën e Maqedonisë. Propozimet e tyre janë krejtësisht të kundërta njëra me tjetrën. Kryetari i Bashkimit Demokratik për Integrim, Ali Ahmeti është kundër sistemit me 1 njësi zgjedhore, pasi sipas tij, në këtë mënyrë shqiptarët do të humbnin disa deputetë.
“Duke pasur parasysh faktin që përqindja e shqiptarëve në votime është shumë e vogël, atëherë sistemi me 1 njësi zgjedhore është i dëmshëm për shqiptarët ku rrezikohet të zvogëlohet numri i deputetëve të tyre ”, është shprehur Ali Ahmeti.
Dhe siç ndodh zakonisht, shqiptarëve u mungon uniteti mes vedi përballë “tjetrit”.
Nga i njëjti tabor por me qëndrim të kundërt, pozicionohet deputet i BDI-së dhe njëherësh n/kryetari i Kuvendit, Rafis Aliti, i cili mbështet nismën që i gjithë territori i Maqedonisë të jetë me 1 njësi zgjedhore, ndërsa listat për deputetë të jenë të hapura.
Ndryshe nga qëndrimi i partisë së tij, Aliti vlerëson se ky model nuk është i dëmshëm për shqiptarët, por përkundrazi, do të demokratizojë partitë dhe institucionet.
“Unë mendoj se nuk është në dëm të shqiptarëve, apo në dëm të partive më të vogla. Të gjitha analizat thonë se në rast se Maqedonia apo Kodi zgjedhor ndryshon dhe kemi një njësi zgjedhore, shqiptarët kuptohet me një votim dinjitoz prej së paku 60% e shqiptarëve të dalin të votojnë ata do të siguronin mbi 30 vende deputetësh. Gjithsesi partitë e mëdha nuk duhet të frikësohen nga një njësi zgjedhore pasi që do të fitojnë në demokratizimin brendapartiak dhe të institucioneve”, deklaroi Rafis Aliti.
Gjatë ditës së djeshme, anëtari i trupit koordinues të Lëvizjes Besa, Zejd Rexhepi, kishte shkruar një koment duke iu referuar sistemit me 1 njësi zgjedhorë, ku thotë :
“Me këtë model zgjedhor partitë garuese do të ofronin kuadro cilësor dhe programe afirmative me çka edhe do të rritej dalja e shqiptarëve në votime. Sidoqoftë, pamvarësisht modelit zgjedhor dhe pamvarësisht afinitetit të Ali Ahmetit dhe BDI-së për të përdhosur dinjitetin kombëtarë, Lëvizja BESA do të arrij që me platformën e saj t’i motivoj shqiptarët që masovikisht të dalin në zgjedhje, sepse fundja shqiptarëve megjithëse u ka ndodhur një e keqe historike e quajtur BDI, ata doemos duhet të kthjellen dhe me faqebardhësi të triumfojnë përballë këtij nënçmimi kombëtar”.
Për sistem me 1 njësi zgjedhore janë edhe Lidhja Social-Demokrate e opozitës, ku sipas tyre ata ishin të parët që dolën me propozimin për ndryshimin e sistemit zgjedhor duke mbështetur partitë e vogla për një njësi zgjedhore, sipas sistemin proporcional.
“Ne, jo vetëm që do të mbështesim propozimet e tilla për një njësi zgjedhore, por do të jemi pjesë e bisedimeve të grupeve të punës. Partitë e mëdha ndoshta mund të humbin ndonjë deputet nga një model i tillë, por do të fitonte demokracia në Maqedoni, pasi e drejta e përfaqësimit të Kuvend do t’u mundësohej edhe partive më të vogla”, deklaron, kryetari i LSDM-së, Zoran Zaev.
Propozimi për 1 njësi zgjedhore me lista të hapura mori përkrahje edhe nga partitë e tjera opozitare maqedonase, partitë opozitare shqiptare RDK dhe Lëvizja për Reforma në PDSH, si dhe ish partnerët e koalicionit të Gruevskit, LD-ja e Pavle Trajanovit dhe PRD-ja e Liljana Popovskës. VMRO DPMNE-ja është përcaktuar për modelin e shumicës, ndërsa kërkon edhe 17 deputetë bonus për partinë fituese të zgjedhjeve. /tesheshi.com/
