Nga Blendi Gashi
Qeveria e Kosovës, në sencën e djeshme akoma pa filluar debate, vendosi ta tërheqë nga rendi i ditës projektligjin për ratifikimin e marrëveshjes për Demarkacionin me Malin e Zi.
Këtë tërheqje, kryeministri kosovar, Isa Mustafa, e arsyetoi me faktin: “një grup parlamentar nuk është i pranishëm në sallë (Lista Serbe) dhe nuk duam koncesion në një ligj që përcakton territorin e Kososvës. Tërheqja nuk nënkupton që do ta ndryshojmë marrëveshjen”.
Kryeministri i cili çdo ditë pohonte se marrëveshja kalon më 1 shtator, me një deklaratë të tillë sikur u mundua të marrë rolin e “heroit”, por që nuk i eci, pasi si pozita e opozita dhe jo vetëm, qenë të vetëdijshme se projektligji u tërhoq pasi mungonin votat.
Pra, Lista Serbe edhe pa qenë fare në Kuvend, u bë “meritore” dhe përcaktoi tërë rrjedhën e një séance dhe dite që mbajti në ankth mbarë popullin në vend dhe jo vetëm.
Por kryeministri, vetëm pak orë pasi bëri deklaratën, u demantua keq nga deputetët e Listës Serbe, të cilët mohuan vënien e kushteve ashtu siç deklaroi Mustafa.
Deputeti i Listës Serbe, Nenad Rashiq, ka thënë se qeveria e Kosovës i injoroi ata, duke mos i konsultuar fare për një çështje kaq me rëndësi, siç është Demarkacioni, ndërsa mohoi që ka pasur kushtëzime për të marrë pjesë në seancë.
“Askush prej nesh, përfaqësues i Listës Srpska, nuk ka qenë i ftuar për negociatë, qoftë individuale, qoftë grupore. E them me bindje të plotë, kurrfarë kushti nuk ka ekzistuar. Ndoshta do të kishim pasur kërkesa po të kishim një takim normal, ku ndoshta do të kishim mundur të flasim për kërkesa eventuale”, ka thënë ai, për televizionin publik, teksa ka shtuar se do të vazhdojnë të veprojnë njëjtë nëse qeveria e Kosovës nuk ndryshon qasjen ndaj tyre.
Por si e shohin analistët tërheqjen e marrëveshjes për Demarkacionit dhe arsyetimin që e bëri kryeministri Mustafa?!
Analisti politik, Arben Qirezi, thotë se tërheqja e nga votimi e marrëveshjes për Demarkacion me arsyetimin se “Lista Srpska” ka kërkuar koncesione në shkëmbim të votimit të Demarkacionit dhe deklarimi se marrëveshja në fjalë nuk do të ri-negocohet, por do të hedhet në votim kur të pranojë Lista Srpska të votoje, ështe anti-kushtetues dhe anti-demokratike.
“Nëse në seancë parlamentare ka kuorum për votimin e Ligjit për ratifikimin e marrëveshjes për demarkacion atëhere, ky ligj duhet të hedhet në votim. Kjo lloj fiskulture politike është anti-demokratike, anti-kushtetuese, anti-ligjore dhe paraqet kulmin e cinizmit të qeverisë dhe të terrorizimit të qytetarëve të vendit. Hedhja e Demarkacionit në votim në ndonje datë tjetër nuk duhet të ndodhë”, ka thënë Qirezi, për tesheshi.com.
Ndryshe, zëdhënësi i qeverisë së Kosovës, Arban Abrashi, ka paralajmëruar se shumë shpejt projektligji për Demarkacionin do të rikthehet në Kuvend, por nuk ka dhënë një datë të saktë kur mund të ndodh një gjë e tillë. /tesheshi.com/
