Një spital i Pragës i ka kërkuar falje sot një pacienteje që javën e kaluar pati një ndërprerje të pavullnetshme të shtatzënisë pasi e ngatërruan atë me një paciente tjetër.
Njëra nga gratë, shtatzënë, erdhi në spital për kontrollin e saj të rregullt, ndërsa tjetra kishte shkuar për t’iu nënshtruar një kuretazhi të mitrës, një operacion për heqjen e indeve, që është edhe një metodë për ndërprerjen e shtatzënisë.
Dy pacientet ishin me origjinë aziatike dhe kishin leje të përhershme qëndrimi në Republikën Çeke, raportojnë mediat lokale. Stafi i spitalit i ngatërroi dhe i bëri pacientes shtatzënë një kuretazh të mitrës, e cila humbi fetusin që mbante.
“Për fat të keq, ky është një gabim njerëzor, një dështim njerëzor”, tha për shtypin Jan Kvacek, drejtor i Spitalit Bulovka në Pragë. Ai theksoi se spitalit i vjen shumë keq për atë që ai e cilësoi si një ngatërresë “tragjike” dhe shpjegoi se institucioni i ka ofruar ndihmë psikologjike dhe ligjore pacientit. “Ajo padiskutim ka të drejtë të marrë dëmshpërblim”, ka theksuar ai, duke vlerësuar se pengesa gjuhësore ka luajtur rol në incident.
Mikal Zikan, kreu i departamentit të gjinekologjisë në spital, tha se pacientja nënshkroi një dokument në gjuhën çeke, e cila megjithatë i referohej pacientes tjetër. “Tri ditë më parë, pacientja ishte informuar plotësisht, në prani të një përkthyesi, për atë që do t’i nënshtrohej, që ishte thjesht një kontroll”, u tha Zikan gazetarëve. Ai shtoi se kirurgët “nuk kishin arsye të besonin se kishin të bënin me një paciente tjetër”.
Spitali pezulloi një punonjës dhe një tjetër tashmë do të punojë nën mbikëqyrjen e një specialisti. /tesheshi.com/
