Në pishinë ndalohen refugjatët meshkuj. Këtë e ka vendosur komuna e Bornheimit, një qytet me rreth 50 mijë banorë në Nordreno-Vestfalia, jo shumë larg Bonnit në Gjermani, pasi disa vajza ishin ankuar se ishin ngacmuar seksualisht nga një grup refugjatësh të mbërritur në pishinë prej një qendre mikpritjeje. Deri më tani nuk ka pasur denoncime penale, ndaj nuk kemi të bëjmë me ndonjë lloj krimi të dokumentuar.
Vajzat kanë deklaruar se janë ndjekur dhe ngacmuar nga një grup të rinjsh, të cilët kishin hyrë në pishinën publike. Të rinjtë nisën të sillen në mënyrë jo normale, duke ngacmuar vajzat që ndodheshin në anë të pishinës. Fillimisht ata janë ngjitur në një trampolinë, e cila ishte e mbyllur e më pas kanë nisur të bezdisin vajzat e zonjat që ndodheshin aty.
“E di se me këtë masë që kemi marrë do të pengojmë një pjesë të madhe të migrantëve, të cilët nuk kanë asnjë faj, por nuk shikoj asnjë mundësi tjetër për të ndaluar këto ngacmime apo për të reaguar ndaj këtij fenomeni. Vendosmëria jonë mbi barazinë gjinore nuk vihet në diskutim”,- ka thënë Markus Schnapka, drejtori i marrëdhënieve me publikun, në pishinë./tesheshi.com/
