Rezistenca heroike brenda mureve të rrethuar të Halepit lindor vjen nga vetë populli sirian dhe jo luftëtarë të huaj, siç është portretizuar shpesh nëpër mediat perëndimore, thotë një gazetar i ngujuar në vendin më të rrezikshëm në tokë.
Bilal Abdulkerim i New Yorker hyri brenda Halepit katër muaj më parë, gjatë një pushimi të shkurtër të rrethimit, por detyra e tij tre-ditore u zgjat për edhe për katër muaj tjerë; është e pamundur që ai të largohet nga aty përveç nëse ecë nga qyteti i kontrolluar nga opozita dhe bie në duart e forcave qeveritare siriane. “Unë jam një njeri me ngjyrë, dhe me mjekër”, më tha ai. “Nuk mendoj se do t’i mbijetoja gjatë qëndrimit në duart e regjimit.”
Abdulkerim po i referohej raportit të OKB-së, ku thuhet se qindra njerëz janë zhdukur javën e kaluar gjatë kalimit për në territorin e qeverisë. Gazetari ishte mjaft i hapur për të ardhmen. Në një intervistë ekskluzive që shënonte Ditën e të Drejtave të Njeriut, ai pranoi: “Ne jemi duke jetuar në kohë të huazuar këtu, por ka ende mundësi që e mira të triumfojë”.
Edhe pse situata duket e zymtë, tani kur forcat e regjimit sirian kanë marrë nën kontroll rreth 85 për qind të pjesëve lindore të qytetit nga rebelët në javët e fundit, Abdulkerim thotë se është jetike për njerëzit në mbarë botën që të mos mashtrohen në lidhje me atë që po ndodh në terren në Halep. Ka ende rreth 300.000 sirianë të bllokuar atje, shpjegoi ai, por nga ata vetëm 10,500 zgjodhën të largohen gjatë një pauzë humanitare, të enjten e kaluar.
Numri i atyre që u larguan javën e kaluar është konfirmuar nga të gjitha palët, përfshirë zyrtarë rusë dhe vëzhgues të OKB-së; vlerësimet për numrin e atyre që mbeten prapa, ndryshojnë nga 100,000 në 300,000. “Në qoftë se kaq shumë njerëz kanë zgjedhur të qëndrojnë në një gjendje rrethimi, pa ushqim dhe rehati dhe kanë preferuar të përballen me bomba fuçi, predha dhe raketa,” pyeti ai, “çfarë ju tregon kjo për regjimin e Bashar Al-Asadit?” Askush, këmbënguli ai, nuk u detyrua të qëndrojë. “Në fakt, nga ata që janë larguar, qindra burra janë zhdukur.
Kjo flet për aktivitetet e forcave qeveritare siriane. “Frika e Abdulkerimit për sigurinë e njerëzve të cilët u larguan pjesët e kontrolluara të Halepit është një jehonë e atyre njerëzve të përmendur nga raporti Rupert Colville, zëdhënës i Komisionerit të Lartë të Kombeve të Bashkuara për të Drejtat e Njeriut: “Duke pasur parasysh të dhënat e tmerrshme të ndalimit arbitrar, torturave dhe zhdukjeve me forcë nga qeveria siriane, ne jemi sigurisht shumë të shqetësuar për fatin e këtyre individëve. “Colville ka marrë raporte se burra të moshës mes 30 dhe 50 vjeç janë ndarë nga familjet e tyre, ndërsa të tjerë të zhvendosur kanë raportuar se janë marrë në pyetje dhe që kartat e tyre të identitetit u janë konfiskuar.
Një tjetër mit që Abdukerimi dëshiron ta hedh poshtë është prania e luftëtarëve të huaj. “I kam takuar tre egjiptianë dhe një nga Uzbekistani, por pjesa tjetër e njerëzve që qëndrojnë në mes të forcave të Bashar Al-Asadit dhe popullit të Halepit janë burrat lokalë nga Halepi si dhe sirianë nga Ushtria e Lirë Siriane.” Ai pranoi se ai nuk ka folur me të gjithë në terren, por ai njeh shumë njerëz dhe thotë se rebelët janë nga popullata lokale. “Kur i kam intervistuar, ata kanë drejtuar gishtin kah shtëpitë e tyre apo rrugët ku ata jetonin. Është ofruar në publik një narrativë se gjoja rebelët janë luftëtarë të huaj dhe se të gjithë luftëtarët janë terroristë; nuk është fare e vërtetë. Terroristët e vetëm në Siri janë Daesh dhe ata nuk janë të pranishëm në Halep”.
Kur Rusia iu bashkangjit luftës vitin e kaluar, Putin njoftoi se kishte për qëllim të heqë qafe Daesh-in, më kujtoi Abdulkerim. “Në qoftë është kështu, pse atëherë rusët po bombardojnë burrat, gratë dhe fëmijët e Halepit?” Ai beson se edhe Shtetet e Bashkuara kanë luajtur rolin e tyre në dezinformata, dhe ai mendon se është mjaft e qartë se Uashingtoni është duke përdorur Daesh-in që të ketë një prani të saj në rajon. “Sa e lehtë do të ishte për avionët luftarakë të britanikëve dhe SHBA-ve për të hedhur ushqim dhe ilaçe në Halep”, pyeti ai. “Në qoftë se ata mund të hedhin bomba mbi Daesh-in, ata mund të na bombardojnë edhe neve me ndihma humanitare.”
Gjatë kohës sa po intervisoja Abdulkerimin, në radio po jepej lajmi mbi një aktivist për të drejtat e njeriut, Peter Tatchell, i cili kishte ndërprerë një fjalim të bërë në Londër nga lideri i Partisë Laburiste, Jeremy Corbyn. Sapo Corbyn kishte filluar të flasë për të drejtat e njeriut, demonstruesit qëndruan para podiumit duke mbajtur postera duke bërë thirrje për të ndërmarrë një hedhje të menjëhershme ajrore të ndihmave ushqimore në Siri. Tatchell ka qenë kritik ndaj liderit të opozitës, si dhe lëvizjes kundër-luftës në Britani se kanë dështuar që të ngrisin mjaftueshëm zërin kundër Rusisë, e cila po mban në këmbë diktaturën brutale të Asadit.Ndërkohë që protestuesit e tjerë po qëndronin në heshtje para Corbyn, Tatchell kishte bërtitur: “Ajo që po ndodh në Halep është një “Guernica moderne”. Ne nuk kemi dëgjuar liderin e Partisë Laburiste të kërkojë sulme ajrore humanitare për civilët e rrethuar të cilët po vdesin, me mijëra syresh.”
Lajmet për protestën janë mirëpritur në Halep, ka thënë Abdulkerim. “Unë me të vërtetë përshëndes përpjekjet e tij dhe unë jam shumë i kënaqur që ai nuk heshti në Ditën e të Drejtave të Njeriut në lidhje me atë që po ndodh në Siri. Unë nuk pajtohem me çdo gjë që ai bën dhe thotë, por unë mendoj se njerëzit që kanë guximin të ngrihen për të shtypurit në të gjithë botën meritojnë të duartrokiten. “Unë do t’i kisha pyetur majtistët dhe lëvizjet kundër luftës këtë: Si mund të jeni kampion i të drejtave të njeriut, nëse ju heshtni kur Rusia fluturon me aeroplanët e luftës duke hedhur bomba, dhe në të njejtën kohë ju kundërshtoni hedhjen e barërave dhe gjërave ushqimore nga forcat tjera, si dhe kundërshtoni futjen zonave për ndalim fluturimi?” Ai pastaj kërkoi prej aktivistëve të tjerë për paqe rreth globit, që të ngriten në këmbë për popullin e Halepit dhe Sirisë duke mbajtur protesta dhe tubime jashtë ambasadave siriane, ruse dhe kineze, dhe duke bërë presion mbi qeveritë e tyre për mbështetje dhe veprim për popullin e Halepit.
“Kina mund të mos ketë një prani në terren, por është duke bllokuar përpjekjet për vendosjen e sanksioneve nga OKB dhe iniciativat tjera të dobishme. Unë i kisha inkurajuar njerëzit që të fillojnë bojkotimin e prodhimeve dhe mallrave kineze. Le të bashkohet kori i zërave për të rritur volumin për popullin e Halepit, Idlibit dhe zonave tjera në Siri”. Gazetari me bazë në Nju Jork hodhi poshtë bisedimet e paqes në mes të Moskës dhe Uashingtonit: “Kush është duke negociuar në emër të popullit sirian? Njerëzit në Halep janë të uritur; ata janë pa ushqim dhe ujë dhe jetojnë çdo ditë nën frikën e bombave fuçi, raketave, madje edhe sulmeve kimike dhe megjithatë ata preferojnë të mbeten e jo të largohen nga zonat e kontrolluar nga forcat rebele.”
Edhe pse ardhja e menjëhershme e Donald Trump-it në Shtëpinë e Bardhë nuk ka ngjallur shumë besim në mundësinë e gjetjes së një zgjidhjeje, përfundoi ai, askush nuk ishte entuziast as për Hillary Clinton.”Ata janë konsideruar si i keqi dhe më i keqi.” Duke iu afruar intervistës me Bilal Abdulkerim, erdhi edhe një lajm për një iniciativë nga Turqia, që përfshinte një autokolonë tokësore të udhëhequr nga Humanitarian Relief Foundation, i njohur me akronimin turk IHH. Karvani është duke planifikuar të niset nga Stambolli me pjesëmarrje nga të gjitha pjesët e Turqisë, duke përfshirë Sakarya, Ankara, Konja, Kajseri dhe Kahramanmaraş. Do do të jenë të përfshirë gjithashtu edhe vullnetarë humanitarë nga jashtë.
Rrugës për në Siri, shpjegoi IHH, karvani do të inkurajojë protesta lokale kundër bombardimeve në Halep. Është e qartë nga përbërja ndërkombëtare e kësaj kolone dhe kundërshtimi masiv me atë që po ndodh me qeniet njerëzore në Halep nëpër të gjithë mediat dhe rrjetet sociale, se njerëzit e zakonshëm në mbarë botën duan qeveritë e tyre të veprojnë tani, në mënyrë që të shpëtojnë sirianët e pafajshëm nga vdekja e mëtejshëm dhe shkatërrimi. Pyetja e madhe është, pse nuk janë këto qeveri – veçanërisht në SHBA dhe Evropë – të gatshme për të vepruar? /tesheshi.com/
