Tashmë, pasi ka kaluar faza e të gëzuarit me faktin se Kosova është më në fund shtet i pavarur, ka ca zëra që vënë në diskutim mbijetesën e saj si të tillë, e që për garanci ekzistence kërkojnë bashkimin e saj me Shqipërinë. Një nga ata që e ka lançuar këtë ide, është dhe zëdhënësi i Vetëvendosje-s, Erzen Vraniçi.
Ai, përmes një shkrimi në Facebook, thotë se Kosova e pavarur si projekt ka kuptim vetëm nëse bashkohet me Shqipërinë.
Sipas tij, nëse nuk ndodh kjo, Kosova rrezikon rikthimin nën Serbi.
“Kosova e pavarur si projekt ka kuptim vetëm nëse bashkohet me Shqipërinë. Si shtet i pavarur nuk ka gjasa të mbijetojë. Nuk ka as bukë e as ujë mjaftueshëm për këtë shkallë të rritjes së popullsisë. E vetme nuk mund të krijojë as ekonomi e as ushtri stabile. Nuk mund të llogaritet që çdo 10-20 vjet do të nxjerrim nga 100 mijë njerëz në mërgim. Nuk mund të llogaritet që gjithmonë mërgata do të na dërgojë të holla që ne të importojmë mallra. As nuk mund të llogaritet që gjithmonë mekanizmat ndërkombëtarë të sigurisë do të jenë këtu për të na garantuar mëvetësinë. Në afat të gjatë Kosova ose do t’i bashkohet Shqipërisë ose do të kthehet nën Serbi. Sa më shumë që të vonohet e para, rriten gjasat për të dytën! Ne do të punojmë me mish e me shpirt për bashkimin e Kosovës me Shqipërinë! Fuqishëm besojmë që ky është interesi i kombit. Pavarësisht interesave lokaliste në Kosovë apo në Shqipëri. Këtë përveç që ua kemi borxh të gjithë atyre që kanë sakrifikuar deri më tash, ua kemi borxh edhe gjeneratave që do të vijnë!”, thotë Vraniçi në qasjen e tij të shkurtër.
Dhe ky shënim i tij, pritet të jetë prelud i shndërrimit të kësaj ideje në një kauzë politike. Pra, trajtimin e Kosovës si mes Serbisë dhe Shqipërisë: duhet të jetë o tek njëra o tek tjetra, e vetme nuk mbijeton dot. /tesheshi.com/
