E ardhmja e Ballkanit në Bashkimin Evropian është gjithashtu çështja e prosperitetit tonë ekonomik, si dhe siguria e rajonit dhe e gjithë Unionit – tha shefja e politikës së jashtme të BE-së, Federica Mogherini.
Në një samit europian në qytetin rumun të Sibiut, ajo u kërkoi udhëheqësve të shteteve anëtare që ta konsiderojnë si prioritet çështjen e së ardhmes së Ballkanit Perëndimor në Union.
“Unë besoj se udhëheqësit sot dhe në të ardhmen do të duhet të marrin në konsideratë të ardhmen e Ballkanit në BE si një prioritet. Është gjithashtu një çështje e prosperitetit tonë ekonomik, si dhe e sigurisë së rajonit dhe gjithë Unionit”, tha Mogherini.
Në samitin e BE-27 në Sibiu të Rumanisë, e cila është e dedikuar për të ardhmen e Unionit, ajo mbërriti nga Tirana ku u takua me krerët e Ballkanit Perëndimor.
“Për mua, një mesazh i veçantë është se procesi i eurointegrimit ka një nivel të lartë mbështetjeje në vendet e Ballkanit Perëndimor”, tha Mogherini.
Ajo shtoi se është shumë e rëndësishme që udhëheqësit evropianë dhe vendet anëtare të mblidhen në Ditën e Evropës dhe të demonstrojnë unitet dhe vendosmëri për të ruajtur dhe zhvilluar më tej projektin e BE-së. /tesheshi.com/
