Makinat shtohen, modernizohen, sofistikohen, ashtu siç ngjet me linjat ajrore dhe avionët, por njerëzit u kthehen përsëri mjeteve më tradicionale, më nostalgjike, të udhëtimit.
Kështu ka ngjarë së fundi, vetëm një ditë më parë, kur është përuruar linja hekurudhore ekspres nga Stambolli në Sofje dhe anasjelltas.
I pari tren ekspres i nisur nga metropoli turk arriti në kryeqytetin bullgar mëngjesin e së martës, pas nëntë orë e gjysmë udhëtim. Dy makinistë, tre konduktorë dhe 22 pasagjerë ishin përuruesit e kësaj linje të re hekurudhore.
Treni i parë nga Sofja për në Stamboll po ashtu u nis mbrëmjen e së hënës, për të arritur në destinacion mëngjesin e së martës.
Linja e re hekurudhore do t’i shërbejë mjaft turizmit, pasi ka lidhje me Beogradin, Bukureshtin dhe Budapestin. /tesheshi.com/
