Starti i garës në Silverstone, në Çmimin e Madh të Britanisë, pritej me padurim, pasi në dy vendet e para në nisje ishin dy rivalët më të egër për momentin në Formula 1, Lewis Hamilton dhe Nico Rosberg. Por një shi që e bëri pistën gati të papilotueshme, e shmangu startin klasik, me garën e dhjetë të sezonit të nisur pas makinës së sigurisë.
Ky ishte dhe momenti kur mundësia për fitore e Hamilton-it u shtua akoma më tepër, pasi Rosberg kishte treguar në garat e fundit se ishte shumë më mirë në nisje.
Hamilton do të kryesonte gjatë gjithë garës, i ndihmuar nga një betejë pas tij mes të riut Verstappen dhe Rosberg-ut. Gjermani do ta parakalonte holandezin vetëm në xhiron e 38-të, por tanimë dëmi qe bërë.
Më i vështirë u bë për Rosberg-un misioni për ta kapur Hamilton-in kur pësoi një defekt në kambio. Inxhinierët i dhanë instruksionet e duhura në radio, por tejkalimi i shpjegimit të tyre e ka vënë Rosberg-un nën hetim nga komisarët, që edhe mund ta ndëshkojnë.
Hamilton do ta kalonte finishin i pari, nën një qiell të hapur, duke sjellë një shpërthim gëzimi të mijëra mbështetësve të tij britanikë. Ai vetë do ta vraponte pas garës e do të kalonte pengesat për t’i përshëndetur nga afër.
Rosberg do mbërrinte i dyti në pikën fundore, i ndjekur nga Verstappen i Red Bull-it. E ngrohtë ishte atmosfera jashtë, e ftohtë akull qe brenda, aty ku tre pilotët fitues bëhen gati për të dalë në podium. Vetëm një shtrëngim të ftohtë duarsh pati mes pilotëve të Mercedes-it, të shoqëruar nga një kthim demonstrativ kurrizi nga gjermani.
Veç Mercedes-it, garën e suksesshme të Red Bull-it e plotësoi Ricciardo me vendin e katërt. E errët dita për Ferrari-n, që duhet të kënaqet me një vend të pestë të Raikkonen-it. Vetëm i nënti Vettel, që sikur të mos i mjaftonin peripecitë, vuan dhe një dënim për mbyllje rruge pilotit të Williams-it, Massa-s.
Sa vjen e ngushtohet diferenca në renditje mes Rosberg-ut dhe Hamilton-it. I pari ka 171 në krye të klasifikimit, i dyti ka 167. Finlandezi Raikkonen ka 106 pikë, në vend të tretë.
Pas dy javësh takimi është në Hungari, në një pistë klasike të Formulës 1. /tesheshi.com/
