“Revolta e grave” në Parlamentin e Shqipërisë e ka kthyer vëmendjen tek roli dhe hapësira që zë në fakt femra shqiptarë në politikë por edhe në institucionet shqiptare.
Vitet e fundit, numri i grave parlamentare ka ardhur duke u rritur por pesha vendimarrëse apo e fjalimeve të tyre nuk është e njëjta, edhe pse kemi progresion të shtuar aritmetik.
Në vitin 1991 Parlamenti shqiptar kishte 250 deputetë ndërkohë që vetëm 8 prej tyre ishin gra.
Megjithatë, edhe sot e kësaj dite mbahen mend diskutimet dhe sjellja prej zonjash të aq pak deputetesh në foltoren e legjislativit shqiptar.
Ndërkaq, në vitin e përmbysjes së madhe 1992, Shqipëria kishte 140 deputetë sa sot, por vetëm 5 prej tyre ishin femra.
Ndërkohë që fjala e tyre kishte më shumë peshë, edhe pse toni që përcillej nuk ishte i lartë dhe me frekuencë të shpeshtë.
Në parlamentin e vitit 1991, Partia Demokratike kishte deputete: Rushen Golemin, kirurge e njohur; Natasha Lako, shkrimtare, Nadire Prifti, arsimtare; Lindita Prifti, ekonomiste. Ndërkohë Partia e Punës kishte një rang më të ulët pasi më shumë ishin aktiviste sesa profesioniste në ndonjë fushë.
Nga Partia e Punës në vitin 1991 ishin deputete: Marie Biba, Lumturi Rexha, Themie Thomai, Elvira Shapllo.
Nga të gjithë këto gra, të vetmet diskutime që mbahen mend nga ai parlament ishin ato të doktoreshës Rushen Golemi dhe të shkrimtares Natasha Lako.
Në vitin 1992 ishin 5 deputete gra. Rushen Golemi, Natasha Lako, Afërdita Zëri dhe Natasha Shehu nga ana e Partisë Demokratike; dhe vetëm Ermelinda Meksi nga Partia Socialiste. Kjo e fundi ka qenë tejet aktive dhe u evidentua si motorri ekonomik i opozitës së asaj kohe. Por me kalimin e viteve gratë nuk u zgjodhën natyrshëm, për aftësinë e tyre, por për dekoracion dhe duke i mëshuar më shumë militancës se profesionit.
Sa më shumë bëhej arrogante politika aq më shumë shtohej numri i grave. Parlamentin i vitit 1996 pati gati gjysmën e parlamentareve gra, madje edhe një nxënëse shkolle, por nuk mbahet mend asnjëra prej tyre.
Ndërsa vitet e fundit, gratë po kujtohen nga skërmitja e dhëmbëve edhe bërtitjet në sallë, paçka se në Parlament shkojnë me veshje jashtëzakonisht luksoze dhe bëjnë tualet të rëndë.
Sot në Kuvend janë 26 gra: 13 të Partisë Socialiste dhe 8 të Partisë Demokratike. LSI ka katër deputete femra. Përgatiti: Ermir Hoxha – /tesheshi.com/
