Një deklaratë e përbashkët e ministrit të Jashtëm francez, Jean-Marc Ayrault, dhe e homologut të tij britanik, Boris Johnson, pas një takimi në Paris bën thirrje që t’i jepet fund rrethimit të Halepit.
“Ministrat u bëjnë thirrje solemnisht aleatëve të regjimit sirian që t’u japin fund menjëherë këtyre operacioneve që shkelin marrëveshjen e arritur në Mynih dhe ligjin ndërkombëtar.”
Në të njëjtën linjë qe këtë të enjte dhe Bashkimi Europian, që kërkoi një pushim të atypëratyshëm të luftimeve në lindje të Halepit për të mundësuar shpërndarjen e ndihmave mjekësore në qytet.
“Mbyllja së fundi e rrugës së fundit të mbetur të furnizimeve e ka kthyer de facto lindjen e Halepit në Siri në një zonë të rrethuar, duke i shkëputur rreth 300.000 njerëz nga çdo formë e ndihmës jetike. Që nga 7 korriku nuk janë lejuar të hyjnë as furnizime, as personel ndihme,” thuhet në një tjetër deklaratë të përbashkët të Federica Mogherini-t, shefes së politikës së jashtme të BE-së, dhe Christos Stylianides-it, komisionerit për ndihmën humanitare dhe për administrimin e krizave.
“Pa qasjen e ngutshme humanitare, furnizimet ushqimore pritet të mbarojnë në javët e ardhshme, dhe Halepi mund të kthehet në tragjedinë më të madhe humanitare të këtij konflikti,” vijon e njëjta deklaratë.
Forcat e regjimit sirian i kanë bllokuar në fillim të këtij muaji të gjitha rrugët që të çojnë në ato pjesë të Halepit të kontrolluara nga rebelët. /tesheshi.com/
