Mjaftoi një takim urgjent i qeverisë rumune të dielën që të shfuqizohej dekreti i nxjerrë prej asaj vetë për korrupsionin. Përse duhet që një qeveri e cila gëzon shumicë të rehatshme në parlament të sillet në këtë mënyrë?
Për të gjetur një përgjigje, që do të shpjegonte edhe protestat popullore në Rumani, që nuk kanë përfunduar edhe pas veprimeve të fundit të qeverisë, pyeta Calin Tariceanu, presidentin e Senatit dhe liderin e Aleancës së Liberalëve dhe Demokratëve, partia më e vogël e koalicionit qeverisës. Ish-ministri Tariceanu pranon se veprimet e qeverisë dhe mënyra sesi janë komunikuar kanë qenë të plogëta, por ai këmbëgul se ato kanë pasur qëllime të mira.
Ai e mohon perceptimin, shumë të përhapur në Rumani dhe jashtë saj, që konflikti është një betejë midis zyrtarëve të korruptuar dhe një shoqërie që lufton kundër korrupsionit.
“Ndjej keqardhje ta them këtë, por gjyqësori në Rumani nuk është i pavarur dhe kjo është një çështje e qartë që duhet adresuar në të ardhmen”. Ai përshkruan një panoramë prokurorësh, sidomos ata nga Drejtoria e Anti-korrupsionit që kanë humbur kontrollin dhe po bashkëpunojnë me shërbimet sekrete.
Prokurorët punojnë krah për krah me gjykatësit, hedh ai dyshime, dhe nëpërkëmbin liritë civile të qytetarëve rumunë në një mënyrë të atillë që nuk është parë që nga koha e komunizmit.
“Agjencia dhe shërbimet sekrete perceptohen tani si institucione që nuk respektojnë kornizën ligjore, janë edhe vetë të korruptuar dhe po përdoren si mjete të rëndësishme në luftën politike në Rumani”, tha ish-ministri për BBC-në.
Argumentimi i tij është diametralisht i kundërt me atë të Laura Kovesi-t, shefes së Agjencisë kundër-korrupsionit që këmbëngul se gjyqësori është i pavarur dhe se drejtoria që ajo kryeson procedon njëlloj figura të qeverisë dhe të opozitës.
Agjencia do të gjymtohej nëse dekreti do të hynte në fuqi.
Një arsye e zemërimit në rrugët e Rumanisë gjatë ditëve të fundit është shpejtësia me të cilën qeveria paraqiti dekretin, pa asnjë shans për debat.
Qeveria do ta korrigjojë të gjithë këtë, thotë nga ana e tij, Tariceanu. Debati do të jetë i përmasave të gjera dhe do të ftohen të marrin pjesë edhe grupet e shoqërisë civile që kanë qenë aktive në protesta.
Shumë nga ata që janë pjesë e protestave në rrugë thonë se dekreti ishte “qepur” për të nxjerrë nga “grepi” disa nga anëtarët aktualë dhe të dikurshëm të qeverive – më i rëndësishmi lideri i social-demokratëve në qeverisje, Liviu Dragnea.
Ai e ka një dënim për manipulim votash dhe përballet me akuza të reja për korrupsion.
Protestat janë më të mëdhatë që nga fundi i regjimit komunist. “Nëse askush nuk mbrohet nga dekreti, përse duhet ta tërhiqnim pas”, i tha Calin Tariceanu, liderit social-demokrat Dragnea. “Kjo mënyrë është për t’u treguar njerëzve se jemi të hapur, të sinqertë dhe shumë të ndershëm. Ne nuk kemi arsye për të mbrojtur ndokënd”
Pas këtij debati, lideri social-demokrat, 54-vjeçari Dragnea ra dakord të tërhiqte dekretin.
Të dielën në mbrëmje, turma të mëdha u mblodhën sërish në Bukuresht, për të festuar fitoren e tyre dhe për të paralajmëruar qeverinë të mos nxisë amendamente të tilla të ngjashme në të ardhmen.
Qeveria kërkon të bindë mbështetësit e vet se bëhet fjalë për një tërheqje strategjike dhe jo një dorëzim.
Në të njëjtën kohë, duhet të bindë publikun dhe Komisionin Europian, se ka një problem real me balancimin e pushteteve midis institucioneve shtetërore në Rumani; dhe se prokurorëve, gjykatësve dhe shërbimeve sekrete duhet t’u vihet freri.
*Nick Thorpe është korrespondent i BBC-së në Europën Qendrore, por edhe i disa kanaleve simotra BBC World News dhe BBC News Channel. Ai jeton në Budapest dhe ka një përvojë 25-vjeçare në raportimin e lajmeve nga ky rajon.
Përktheu: Juli Prifti – /tesheshi.com/
