Nga Blendi Gashi
Zgjedhjet e parakohshme në Kosovë po shihen çdo ditë e më shumë po shihen si opsion. Dhe jo vetëm nga kriza politike tash e dy vjet, por dhe nga një sforco që i mban bashkë dy “armiqtë” genetikë të politikës së Prishtinës, LDK-në dhe PDK-në.
Madje kjo e dyta po ka kurajon ta artikulojë nevojën e shkuarjes në zgjedhje të parakohshme. Është vetë kreu i saj, Kadri Veseli – njëherësh njeriu i ambicies së qartë për t’u bërë kreministër – që nuk e ka patur për dert me e përmend disa herë një mundësi të tillë.
Ndërsa nga LDK-ja e Isa Mustafës bëjnë sikur nuk dëgjojnë. Për ta, koalicioni po shkon si ma e mira.
Por ama, zyrtarë të caktuar të PDK-së haptaz kanë shprehur qëndrimin e tyre se koalicioni fare lehtë mund të prishet, dhe një prej arsyeve është mospajtimi për buxhetin 2017-të.
Një burim kofidencial brenda kësaj force politike e konfirmon këtë.
Sipas burimit në fjalë, “martesa e zorit” mund të kalojë në divorc në fund të këtij viti, kur në kuvend të vjen buxheti për miratim.
Forcat politike e kanë nuhatur këtë, ndaj dhe kanë nisur një fushatë para-elektorale duke bredhur anëkend Kosovës për “takime me popullin”. Por mbi të gjitha, disa prej tyre kanë nisur dhe negociimet e fshehta, nën rogoz, për koalicion para ose pas-zgjedhor.
Burime të sigurta të portalit tesheshi.com brenda PDK-së, kanë bërë të ditur se tashmë kanë nisur negociatat në heshtje për shkuarjen në zgjedhje të reja, por mbi të gjitha po bisedohet për formimin e koalicionit qeverisës pas zgjedhjeve.
“Zgjdhjet e reja do të trokasin më shpejt se që mendohet. Mund të konfirmoi për portalin tuaj se tashmë veç kanë filluar edhe bisedat individuale mes zyrtarëve të PDK-së dhe AAK-së , pra personaliteteve të krahut të luftës për dakordimin dhe formimin e koalicionit qeverisës pas zgjedhje të parakohshme që pritet të mbahen vitin e ardhshëm. Biseda të tilla po zhvillohen edhe në nivel të deputetëve të partive në fjalë. Por, të jem i qartë gjithçka është në fazën fillestare, por shihet një gatishmëri e madhe që gjithësesi pas zgjedhjeve të reja të formohet një koalicion qeverisës i drejtuar nga partitë e krahut të luftës. Besoj fuqishëm se do të ndërtohet një koalicion i tillë dhe këtë bindje ma përforcon edhe qasja që kanë ndaj njëri-tjetrit Kadri Veseli e Ramush Haradinaj”, tha burimi.
Por AAK nga ana e saj shfaqet e rezervuar në konfirmimin e kësaj të dhëne dhe kjo është mëse e natyrshme. N/kryetari Ahmet Isufi, tha se nuk është në dijeni nëse ndonjë zyrtar i subjektit të tij ka nisur kontakte me PDK-në.
“Jo nuk besoj se ka kontakte të tilla. Unë nuk jam i informuar për një gjë të tillë, por mund të ju them se vendi duhet të shkojë sa më parë në zgjedhje të prakohshme”.
Ndërkohë, gjykuar nga ajo çfarë informon burimi brenda PDK-së, është mëse e logjikshme që dy kahje lufte, pavarësisht diferencave dhe përçarjeve politike në vite, të afrohen në një kontekst të ri për ta nxjerrë jashtë loje LDK-në, tashmë jo të Rugovës por të Isa Mustafës; që, kur nuk gëzon konsesus të plotë si figurë në partinë e tij, nuk ka se si të pëlqehet nga krahu i luftës; i cili, edhe në kushte paqeje i sheh me lupë ata që nuk kanë prekur armë më dorë në ditët më të zeza, e që për më tepër, i përkasin ish-estabilishmentit komunist të ish-Jugosllavisë. /tesheshi.com/
